Vernidub: "Məğlubiyyətə layiq deyildik”

“Nə vaxtsa, bir məğlubiyyət olmalı idi. O da bu gün oldu. Oyuna görə məğlubiyyətə layiq deyildik. Ən azından bir xal qazanmalı idik, hətta udmaq belə, mümkün idi. Nə onlarda, nə də bizdə çox böyük epizodlar var idi. Rəqib bir imkanı dəyərləndirə bildi, biz isə edə bilmədik. Bununla barışmaq və işləmək lazımdır. Gələcəkdə nə olacağını həyat göstərəcək”.

Futbolxeber.az saytının məlumatına görə, bu sözləri “Neftçi”nin baş məşqçisi Yuri Vernidub Azərbaycan Premyer Liqasıın 23-cü turunda “Turan Tovuz”a 0:1 hesabı ilə uduzduqları oyundan sonra deyib.

O, “Neftçi”nin yoluna davam etməli olduğunu bildirib: “İntensiv oyun getdi. O qədər qol epizodları yox idi. Amma oyunun özü intensiv keçdi. Bu mərhələni də keçməliyik. Uduzduq. Bunu da geridə qoymalı və yolumuza davam etməliyik. "Turan Tovuz" sadə komanda deyil. Ona görə 3-cü pillədədir. Biz onlardan heç nə də geri qalmadıq. Təəssüf ki, bir qol buraxdıq və o da matçın taleyini həll etdi”.

Ukraynalı mütəxəssis “Heyətiniz qarşıya qoyulan hədəflərə çatmaq üçün yetərlidir?” sualını belə cavablandırıb: “Dəfələrlə demişəm, bura gələndən hansı heyət var idisə, o da qalıb. Nə kimisə göndərmişik, cəmi bir nəfər transfer etmişik. Hər şey də bu heyətlə davam edəcək”.

“Neftçi”nin baş məşqçisi Tovuz klubu ilə görüşdə hər iki cinah müdafiəçilərinin olmamasının nəticəyə ciddi təsir göstərmədiyini söyləyib: “Ortiz zədə aldı və onu məcburiyyətdən dəyişdik. Bizdə 23 futbolçu var və onların hamısı oynamalıdır. Bura oturmağa gəlməyiblər. Heç vaxt demirəm ki, mən yaxşı məşqçiyəm, oyunçular pisdir. Yox. Onlar yaxşı oyunçulardır. İstəyim odur ki, hər matçdan sonra artırsınlar”.

Y.Vernidub bəzi futbolçuların oruc tutmalarının onların çıxışına təsir etdiyini vurğulayıb: “Amma bu, təkcə bizdə deyil. Azərbaycanda olan bütün komandalarda da eyni hal yaşanır. Onların dini etiqadlarını pozmağa özümdə haqq görmürəm. Bunun da öhdəsindən gələcəyik. "Turan Tovuz"da da belə bir şey var. Saat 8-də oyuna çıxmaq, 7-ə kimi yemək yeməmək...”

Mütəxəssis heç vaxt sələfləri barədə danışmağını qeyd edib: “Mənə qədər burada bir baş məşqçi olub. O məşqçi haqda pis bir şey deyə bilmərəm. O, mənim həmkarımdır. Komanda yığıb və gəlmişəm işləməyə. Mən gəlim deyim ki, mənə qədər olan hamı günahkardır, xeyr, bunu heç vaxt deməmişəm, demərəm də. Bacarmaq lazımdır ki, zərbəni ala biləsən və insan olaraq qalasan. Ona görə də indiyə qədər çalışdığım komandalarda da həmişə nəticə olub”.

Vernidub "Neftçi"nin "Qarabağ"la təxirə salınmış matçının mayda keçirilmə ehtimalına da toxunub: “Bu qərarı nə mən, nə də "Qarabağ" verir. Bildiyim qədərilə, PFL verir. Bizə nə vaxt deyilsə, oynamağa hazırıq. Bizə hansısa tarix deyilsə, öz təklifimizi deyəcəyik. Bildiyim qədərilə hər iki komanda tarixdə razılaşmalıdır. Sabah desələr, sabah oynayacağıq. Mənim üçün çox maraqlı oyundur. Güclü komandaya qarşı oynamaq maraqlıdır. "Turan Tovuz" çox güclü komandadır, 3-cü yerdədir. Futbolçulara dedim ki, özümüzü yoxlayaq ki, o mərhələyə gəlmək üçün nələr edək. Həyat bununla bitmir. Yolumuza davam edəcəyik. Növbəti oyunda qalib gəlməyə çalışacağıq”.