Azər Bağırov: “Biz iki xal itirdik”

"Kəpəz" Azərbaycan Premyer Liqasının 23-cü turunda səfərdə "Zirə" ilə 2:2 hesablı heç-heçə edib.

Futbolxeber.az saytının məlumatına görə, Gəncə təmsilçisinin baş məşqçisi Azər Bağırov matçdan sonra keçirilən mətbuat konfransında fikirlərini bölüşüb:

- Azarkeşlərimizə təşəkkür edirəm ki, sona qədər komandanın yanında oldular. Yaxşı və pis günümüzdə yanımızda olmalarını istəyirəm. Əsl azarkeşlər dar gündə tanınır. Matça gəldikdə, yaxşı komandaya qarşı oynadıq. "Zirə"də illərin oturuşmuş heyəti var. Rəqibin güclü tərəflərini futbolçulara demişdik. Maraqlı oyun alındı. İlk 10 dəqiqə bizim üçün yaxşı olmadı. 10-cu dəqiqədən sonra toparlandıq. Daha dəqiq oynamağı bacarsaydıq, sonuncu dəqiqədə qələbəni əldən verməzdik. Əfsuslar olsun. Önümüzə baxacağıq. Qarşıda çətin oyunlarımız var. "Zirə"yə uğurlar arzulayıram.

- Bu gün "Kəpəz" 1 xal qazandı, yoxsa 2 xal itirdi?

- Son saniyələrdə qol buraxdığımızı nəzərə alsaq, mənə elə gəlir ki, biz iki xal itirdik.