Qurban Qurbanovdan qələbə şərhi

“Futbolçularımı təbrik edirəm. Vacib nəticədir. Oyun əlavə vaxta gedə bilərdi. İkinci hissədə oyunu tam ələ almışdıq. Bəzən səhvlərimiz olurdu. Qələbə çox vacib idi. Futbolçular düzgün oynamağa çalışdılar. Bir az yorğunluq hiss olunurdu. Qarşıdakı günlərdə yavaş-yavaş özlərinə gələcəklər. Hər iki komandanın azarkeşlərinə təşəkkür edirəm. Ayxan Abbasova uğurlar arzulayıram".

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan kubokunun 1/4 final mərhələsinin cavab oyununda “Şamaxı”nı 3:1 hesabı ilə məğlub etdikləri görüşdən sonra deyib.

Daha sonra təcrübəli mütəxəssis jurnalistlərin suallarını cavablandırıb:

- Kadi Borgesi "8 nömrə" mövqeyində sınadınız. Bu, gələcək üçün mesajdır?

- Kadi də o qabiliyyət var. Bu gün onu həmin mövqedə oynatmaq lazım idi. Pedro Bikalyo "Nyukasl" və "Sabah"la oyunlarda xeyli güc sərf etmişdi. Ona görə ehtiyat etdik. İstərdik ki, Kadi daha çox ön xətdə oynasın. Bəzən oyun quruculuğunda onun kimi oyunçunun bugünkü mövqedə olması lazımdır. Gələcəkdə belə rotasiyalar olacaq. Montiel də orada oynaya bilər və ya yerlərini dəyişə bilərik. Futbolçuların bir neçə mövqedə oynamaq qabiliyyətinin olması sevindirici haldır.

- Yarımfinalda rəqibiniz "Sabah" ola bilər. Bu oyunlardan gözləntiniz nədir?

- Yarımfinalda kimlə oynayacağımızın fərqi yoxdur. "Sabah"la oyunlar azarkeşləri daha çox stadionlara cəlb edir.

- "Sabah"ın prezidenti Maqsud Adıgözəlov müsahibəsində bildirib ki, Qurban Qurbanov ötən mövsüm kubokun finalındakı qələbəmizə kölgə salıb. Buna cavab verəcəksiniz?

- Keçmişə qayıtmaq istəmirəm. Bu suala cavab verməyəcəm. Oyunun gedişatında olan şeylər orada da qalır. Keçmişə qayıtmağı xoşlamıram.

- Aprel ayında "Sabah"la 3 dəfə qarşılaşa bilərsiniz. Bundan əlavə "Neftçi" ilə oyun da var. Həmin ərəfədə milli komandaların oyunları ilə bağlı fasilə də olacaq. "Qarabağ" belə qrafikə hazırdır? Bunun öhdəsindən gələ biləcəksiniz?

- Gəlməyinə gələcəyik. Bütün matçları oynamalıyıq. Yorğunluq, hansısa psixoloji gərginlik ola bilər. Bu, futbolçunun həyatıdır, məşqçilərin işidir. İstənilən oyuna futbolçuları kökləməliyik. Əlbəttə ki, bəzən bu, alınmır. Hər oyuna maksimum nəticə üçün çıxacağıq.

- Son vaxtlar "Qarabağ"ın üzərində təzyiq çoxdur. Sanki komandanız meydanda tək qalıb...

- Psixoloji gərginlik var. İlboyu sıx qrafikdə oyunlar keçirmək asan deyil. Hazırda elə bir vəziyyətdəyik ki sakit olmağa vaxt yoxdur. Hər matç ötdükcə tələblər də artır. Bizim məqsədlərimiz daim yüksəkdədir. Bu futbol həyatının normal gedişatıdır. Bəzi futbolçular bu gərginliyin ortasında gücdən düşmüş kimi görsənir. Biz bunu maksimum dərəcədə aradan qaldırmağa çalışırıq.

- Qış fasiləsindədə də bəzi futbolçularınıza təkliflər də var idi. Yeni mövsümdə yenilənmış "Qarabağ" görə bilərikmi, yoxsa..?

- Hər şey gözlənilir. Ola bilər dəyişiklik az olsun, amma bizdən asılı olmadan səbəblərdən də çox ola bilər. Biz bu il həddindən artıq çox yükləndik. Oyun sayı əvvəlki illərə baxanda daha çox oldu. İstərdim ki, heyətimiz daha geniş olsun. Yeni mövsümdə əlimizdən gələni edəcəyik ki, heyət baxımından əziyyət çəkməyək.