“Penaltini yerinə yetirə bilsəydik...”

“Üzücü məğlubiyyət oldu. İlk oyunda qalib gəlsək də, bilirdik ki, bizi çətin cavab görüşü gözləyir. İlk 10 dəqiqə bizim üçün yaxşı olmadı. Bundan sonra həm fərqləndik, həm də qol epizodlarımız oldu. İkinci hissədə rəqibin təzyiqini gözləyirdik. Müdafiə planında səhvlər etdik. Buna baxmayaraq uşaqlar sona qədər vuruşdular. Sonuncu dəqiqədə penaltini yerinə yetirə bilsəydik, bəlkə əlavə vaxtda şanslarımız olardı. Dörd gündən bir oynamaq öz sözünü deyir. Premyer Liqanın 3-cü dövrəsinə hazırlaşacağıq. Kubok bizim üçün bitdi. Rəqibi təbrik edirəm”.

Futbolxeber.az saytının məlumatına görə, bu sözləri “Şamaxı”nın baş məşqçisi Ayxan Abbasov Azərbaycan kubokunun 1/4 final mərhələsinin cavab oyununda “Qarabağ”a 1:3 hesabı ilə uduzduqları oyundan sonra deyib.

Daha sonra o, jurnalistlərin suallarını cavablandırıb:

- Penaltini Abdullahi Şuaybu yerinə yetirmək istəsə də, zərbəni Karim Rossi vurdu. Bunu necə şərh edərdiniz?

- Bizdə iki penalti vuran var, Rikardo və Karim. Rikardo da bir kubok oyununda vura bilməmişdi. Karim isə 3 penalti yerinə yetirib. Yorğunluq, oyunun stressi var idi. Qismət.

- Premyer Liqanın son oyunundan sonra PFL-lə bağlı açıqlamanız oldu. Buna cavab gəldi?

- Danışıqlarımız oldu. Hamımız istəyirik ki, meydançalarımız yaxşı olsun, şərait günü-gündən inkişaf etsin. PFL-də çalışanlarla bizim çoxdan əlaqəmiz var. Bir anlaşılmazlıq olmuşdu. Onlara da uğurlar arzulayıram, bizə də. Bir-birimizi başa düşdük, heç bir problem yoxdur.