“Neftçi”yə qarşı daha bir hakimi “səhvi”: Hakimlər Komitəsində narazılıq

Dünən “Neftçi” mövsüm ərzində üzləşdiyi hakim haqsızlıqları ilə bağlı bəyanat yaydı. Klubun açıqlamasında və yayımladığı videolarda bir çox epizodlar yer almışdı. Lakin bu, “ağ-qaralar"ın üzləşdiyi bütün hakim səhvləri deyil.

Həmin anlardan birini aşağıdakı videoda təqdim edirik: 

Bu epizod Azərbaycan Premyer Liqasının 17-ci turu çərçivəsində “Karvan-Yevlax”a qarşı matçda qeydə alınıb. Belə ki, qarşılaşmanın ikinci hissəsində Yevlax klubunun müdafiəçisi cərimə meydançasının daxilində Bassalu Sambunun üzünə əli ilə zərbə endirir. Lakin nədənsə bu epizodu nə yan xətt hakimi görür, nə də baş hakim. Ən biabırçı məqam isə efirdə təkrarı bir neçə dəfə nümayiş edilən epizodun VAR-ın diqqətindən yayınmasıdır. Bu cür epizoda VAR necə reaksiya verməyə bilər? Özü də həmin matçda VAR-da Elçin Məsiyev kimi təcrübəli referi olub.

Əliyar Ağayev və Elçin Məsiyev Sambuya qarşı kobudluğa reaksiya verməsə də, Hakimlər Komitəsi buna lazımi reaksiyanı göstərib. Belə ki, epizod komitədə müzakirə olunarkən istər Ağayev, istərsə də Məsiyev yüngül formada desək, çox sərt şəkildə qınanıblar. Lakin görünən odur ki, qınamaqla, bir-iki oyun cəza verməklə, bu məsələ düzələn deyil. Sambunun üzünə endirilən zərbəni “görməyən” hakimlərin Şamaxıda Sekin epizodunda penalti “görmələri” bütün bunların səhv olmadığını düşünməyə əsas verir...   

Futbolxeber.az