Pedro Bikalyo: “Bu, karyeramın ən vacib matçıdır”

“Bu gün 20 yanvardır. Bilirəm ki, ölkə üçün çox önəmli və kədərli gündür. 36 il bundan öncə insanlar müstəqillik üçün küçələrə axışıb və həyatlarını qurban veriblər. Allah onlara rəhmət etsin”.

Futbolxeber.az saytının məlumatına görə, bu sözləri "Qarabağ"ın yarımmüdafiəçisi Pedro Bikalyo deyib.

UEFA Çempionlar Liqası Liqa mərhələsinin 7-ci turunun "Ayntraxt"la oyunundan əvvəl keçirilən mətbuat konfransında iştirak edən braziliyalı futbolçu oyunlar bağlı deyib:

“Çempionlar Liqası matçıdır, bizim üçün çox vacibdir. Türkiyədə idik, orada hazırlıq keçdik. Bu, bizim üçün çox önəmli idi. İnanıram və ümid edirəm ki, bu toplanışda işlədiklərimizi sabah həyata keçirə biləcəyik”.

O, “Ayntraxt”la matçı karyerası üçün əhəmiyyətli hesab etdiyini söyləyib:

“Turnirin nəhəngliyini, oyunun vacibliyini nəzərə alsaq, çox önəmli matçdır. Qalib gəlsək, nələr olacağını təsəvvür edə bilirsiniz”.

“Yenidən "matçın ən yaxşısı" olmaq məqsədin var?” sualını Bikalyo belə cavablandırıb:

“Belə məqsədim yoxdur. Əsas komandanın qələbəsidir. Oyundan sonra kim seçiləcək, başqa məsələdir”.

Bikalyo adının digər klublarla hallanmasının “Ayntraxt”la matça fokuslanmasına mane olmayacağını vurğulayıb:

“Qətiyyətlə deyə bilərəm ki, bu, mənim oyuna köklənməyimə mane olmur. Bu, karyeramın ən önəmli matçıdır. Tamamilə bu qarşılaşmaya fokuslanmışam. Digər məsələlər Qurban Qurbanovun və klub rəhbərliyinin işidir. Mən yanız oyunu düşünürəm”.