“Neftçi” və “Simurq”un sabiq qapıçısı “İnter”də

“İnter”in əvəzedici komandası “Şəfa” stadionunda təlim-məşq toplanışını davam etdirir. Futbolxeber.az-ın klubun rəsmi saytına istinadən verdiyi məlumata görə, dünən komanda növbəti yoxlama matçını keçirib və həmin oyunda MOİK-i 6:1 hesabıyla məğlub edib. Əvvəlki matçlarda olduğu kimi, ilk dəqiqələrdən qapını Eyyub Əliyev qoruyub. Əvəzedici komandanın baş məşqçisi Rüstəm Əliyev gənc qapıçının gələcəyi barədə danışıb: “Eyyub bizimlə olduğu müddətdə özünü yaxşı tərəfdən göstərdi. Onun komandada qalmasını istərdim. Lakin onun gələcəyi barədə dəqiq danışa bilmirəm, axı öncə onun icarəsi barədə MOİK rəhbərliyiylə danışmaq lazımdır. Ümid edirəm ki, bu məsələdə ümumi razılığa gələ biləcəyik”.

 Qeyd edək ki, Eyyub Əliyev əvvəllər “Neftçi” və “Simurq” komandalarında çıxış edib.