“Zirə” mövsümün ikinci hissəsinə 2 futbolçusu olmadan hazırlaşır

Yanvarın 3-dən məşqlərə start verən “Zirə” mövsümün ikinci hissəsinə 2 futbolçusu olmadan hazırlaşır.

Futbolxeber.az saytına bu barədə klubun mətbuat xidməti Elmar Abdullazadə məlumat verib.

O bildirib ki, Davit Volkov və Rikardo Martines Quima hazırda düşərgədə yer almır.

Bir müddətdir zədədən əziyyət çəkən Volkov hələ də müalicə alır. Onun sıraya nə vaxt dönəcəyi bilinmir.

Quima isə Afrika Millətlər Kubokunda mübarizəni davam etdirən Mozambik millisinin heyətində yer alır. Onun “Zirə”yə nə vaxt qoşulacağı yığmanın turnirdəki çıxışından asılıdır.

Qeyd edək ki, Mozambik millisi bu gün Afrika Millətlər Kubokunun 1/8 finalında Nigeriya ilə üz-üzə gələcək. Qarşılaşma Bakı vaxtı ilə 23:00-da start götürəcək.