Kurban Berdiyevdən Ayxan Abbasova cavab: “Dedikləri məni maraqlandırmır”

“Klassik kubok oyunu alındı. Adətən belə görüşlər gərgin keçir, bu oyun da istisna olmadı”.

Futbolxeber.az saytının məlumatına görə, bu sözləri "Turan-Tovuz”un baş məşqçisi Kurban Berdiyev Azərbaycan Kubokunun 1/8 finalında “Şahdağ-Qusar” üzərində qazanılan 2:1 hesablı qələbəni şərh edərkən deyib.

73 yaşlı mütəxəssis matçın ağır keçdiyini bildirib: “Bu gün əsasən az oynamaq şansı qazanan futbolçulara özlərini göstərmək imkanı verdik. Bu matçda motivasiya çatışmazlığımız hiss olunurdu”.

K.Berdiyev Azərbaycan millisinin baş məşqçisi Ayxan Abbasovun yığmaya dəvət edilən futbolçulara daha çox oynaya biləcəkləri klublara keçməyi tövsiyə etməsinə də toxunub. “Siz bu gün yerli futbolçulara bu səbəbdən çox oyun şansı verdiniz?” sualını Berdıyev belə cavablandırıb:

“Milli komandanın baş məşqçisinin dedikləri məni maraqlandırmır. Yerli futbolçulara daha çox şans verdik ki, sonra onların səhvlərini analiz edək. Çempionatda da həmin səhvləri təkrarlamasınlar”.