“Araz-Naxçıvan”ın problemi məşqçi deyil - QEYD

Azərbaycan Premyer Liqasında son turlar qeyri-stabil çıxışla yadda qalan klublardan biri də “Araz-Naxçıvan”dır. Ötən mövsümün bürünc mükafatçısı son 6 turda cəmi bir qələbə qazanıb. Onda da Elmar Baxşıyevin komandası “Karvan-Yevlax”a çətinliklə qalib gəlib. Naxçıvan təmsilçisinin “Sabah”, “Neftçi” və “Turan Tovuz” kimi iddialılarla heç-heçə etməsini hardasa başa düşmək olar. Lakin 4 turda iki məğlubiyyət kollektivin iddiasına uyğun gəlmir. Bəs bu uğursuzluğun səbəbi nədədir? Nə üçün ötən mövsümün bürünc müfakatçısı yayda heyətini gücləndirməsinə baxmayaraq, cari çempionatda 1 il əvvəllə müqayisədə zəif təsir bağışlayır?

Adətən bu cür hallarda ağıla gələn ilk variant baş məşqçi olur. Lakin eyni sözləri “Araz-Naxçıvan” barədə demək, uğursuz çıxışı Elmar Baxşıyevin üzərinə yıxmaq olmaz. Ən azından yaxın keçmişi yada salaq. Ötən mövsüm “Araz-Naxçıvan”ın bürünc medal qazanmasında Elmar Baxşıyevin böyük rolu olmuşdu. Məhdud büdcə ilə yaxşı kollektiv formalaşdıran Baxşıyevin komandası maddi baxımdan, heyətinə və şəraitinə görə geri qaldığı “Turan Tovuz”, “Sabah” və “Neftçi” kimi iddialıları qabaqlamağı bacardı. Bununla kifayətlənməyən Naxçıvan klubu avrokuboklarda da adından söz etdirdi. Düzdür, indiki dövrdə qitə kuboklarında bir mərhələ adlamaq ciddi uğur kimi qəbul olunmur. Sadəcə məsələ ondadır ki, Elmar Baxşıyevin komandası ölkə daxilində olduğu kimi, xaricdə də özündən qat-qat güclü kollektivi geridə qoya bildi. Halbuki püşkatmadan sonra demək olar ki, heç kim “Araz-Naxçıvan”ın “Aris”i üstələyəcəyinə inanmırdı. Yunanıstan klubu istər təcrübəsinə, istər heyətinə, istər şəraitinə görə təmsilçimizi qabaqlayırdı. Buna baxmayaraq, Naxçıvan klubu boyundan yuxarı tullanaraq “Aris”i mübarizədən kənarlaşdırdı. Uzun sözün qısası, bütün bunları görməzlikdən gəlmək olmaz.

Bu gün Naxçıvan klubunun əsas problemi bəzi futbolçuların imkanlarından aşağı səviyyədə çıxış etməsidir. Xüsusən də yayda komandaya böyük ümidlərlə cəlb olunan legionerləri qeyd etmək olar. Bruno Franko, Hamidu Keyta, Bar Kohen kimi əcnəbilər geridə qalan müddətdə ümidləri doğrultmurlar. Yay transferlərindən yalnız Şarl Boli və Ba-Muaka Simakalanın çıxışını uğurlu hesab etmək mümkündür.

Ötən mövsüm hücum xəttinin lideri olan Ramon Maçadonun uzun müddət zədədən əziyyət çəkməsi də “Araz-Naxçıvan”ın çıxışına təsirsiz ötüşməyib.

Komandanın uğursuzluğunun bir başqa səbəbi isə İqor Ribeyronun gedişindən sonra müdafiə xəttinin ötənilki kimi etibarlı olmamasıdır. İssuf Paro braziliyalını layiqincə əvəzləyə bilmir. Bəxtiyar Həsənalızadə və Rahil Məmmədovun isə aldıqları zədələr stabil çıxışlarına mane olur.

Sadaladığımız bütün bu səbəblər yekunda “Araz-Naxçıvan”ın cari mövsüm əvvəlki kimi parlaq çıxış etməsinə mane olur. Lakin vəziyyət heç də faciəvi deyil. 13 oyundan 20 xal toplayan “Araz-Naxçıvan” hazırda 6-cı pillədə qərarlaşıb. Komanda ikinci pillədən cəmi 6 xal geri qalır. Qarşıda isə hələ 20 tur var. Odur ki, “Araz-Naxçıvan” tezliklə vəziyyəti yaxşıya doğru dəyişə bilər. Təbii ki, bunun üçün ilk növbədə bəzi futbolçuların toparlanması, onlara bəslənən ümidləri doğrultması mütləqdir. Futbolçu(lar) potensialından aşağı çıxış edirsə, özünə bənzəmirsə, buna Elmar Baxşıyev neyləsin?..

İBRAHİM