Hayderson Hurtado: “Turan Tovuz” avrokuboklara vəsiqə qazanacaq”

“Turan Tovuz”un müdafiəçisi Hayderson Hurtadonun Futbolxeber.az saytına müsahibəsi

- “Araz-Naxçıvan”la görüşdən 1 xalla ayrıldınız. 1:1-lik heç-heçəni necə şərh edərdiniz?

- Bizim üçün çox çətin oyun oldu. Hesabda geri düşdük. Bundan sonra uzun müddət bərabərlik qolu vurmaq üçün çalışdıq. Yekunda xarakter nümayiş etdirdik və meydandan 1 xalla ayrıldıq.

- Qələbə qazanmağınıza nə mane oldu?

- Bir az daha həvəsli olmalıydıq. Matça yaxşı başlamadıq. Fasilədən sonra üstünlüyü ələ aldıq, təzyiqi artırdıq. Birinci hissədə də ikinci 45 dəqiqədəki kimi oynasaydıq, qələbə qazanardıq.

- Uzun müddət hesabda geri olduğunuzu nəzərə alsaq, 1 xalı “Turan Tovuz” üçün yaxşı nəticə saymaq olar?

- Məncə, biz bu oyunu udmalıydıq. Düzdür, “Araz-Naxçıvan” güclü rəqibdir və bu komanda ilə matçda 1 xal pis nəticə deyil. Lakin qalib gəlsəydik, daha yaxşı olardı.

- Ardıcıl ikinci görüşdə qələbə qazana bilmirsiniz. Bu nəticələr komandanı hədəflərindən uzaqlaşdırmır?

- Mövsümün sonuna hələ çox var. Sona qədər mübarizə aparacağıq. Bizim möhtəşəm azarkeşlərimiz var və onları sevindirmək istəyirik. Avrokuboklara vəsiqə qazanacağıq. Yayda Avropa kublarını Tovuza gətirəcəyik.

- Qarşıdan “Neftçi” ilə oyun gəlir. Həmin matçda qələbə həsrətinə son qoymaq mümkün olacaq?

- “Neftçi” ilə öz evimizdə oynayacağıq. Meydana qələbə üçün çıxacağıq. İnanıram ki, azarkeşlərimizin dəstəyi ilə qalib gələcəyik.

Fərəc Aslanov