“Turan Tovuz”un qapıçısı: “İndidən turnir cədvəlinə baxmağa dəyməz”

"Son turda “Sumqayıt”a qarşı keçirdiyimiz oyun çətin alındı. 75-ci dəqiqəyə qədər gərginlik var idi. Üçüncü qoldan sonra rahatlaşdıq. 2:0 bir qədər sürüşkən hesabdır. Ona görə də sona qədər mübarizə apardıq”.

Futbolxeber.az saytına müsahibəsində bu sözləri “Turan Tovuz”un qapıçısı Oleq Baklov deyib.

Azərbaycan Premyer Liqasının 7-ci turunda “Sumqayıt”ı 3:0 hesabı ilə məğlub etdikləri matçın gedişində penalti qaytaran qolkiper öz çıxışına qiymət vermək istəməyib: “Çox şadam ki, komandamı həmin epizodda xilas etdim. Gələcəkdə də çalışacağam ki, “Turan Tovuz”un uğurlarında pay sahibi olum. Öz çıxışıma qiymət verə bilmərəm. Bu barədə azarkeşlər danışsalar, daha yaxşı olar. Ümumilikdə özümü komandada çox yaxşı hiss edirəm”.

Tacikistan millisinin üzvü komandasının hazırda çempionatın lideri olmasına belə münasibət bildirib: “Geridə cəmi 7 tur qalıb. Ona görə də indidən turnir cədvəlinə baxmağa dəyməz. Qarşıda hələ çox oyun var. İrəli getmək lazımdır”.

O.Baklov növbəti turda “Qarabağ”a qarşı keçiriləcək matça optimal formada çıxacaqlarını vurğulayıb: “Düşünmürəm ki, çempionatda yaranan fasilə ziyanımıza işləsin. Əksinə, fasilə oldu, istirahət etdik və bunun xeyrimizə olacağını fikrindəyəm. Tam gücümüzlə hazırlaşırıq. “Qarabağ”la görüşə optimal formada çıxacağıq. Rəqib barədə əlavə nəsə deməyə ehtiyac yoxdur. Onların gücü hər kəsə məlumdur”.

Fərəc Aslanov