Cordan Rezabala: “Çoxları “Neftçi”nin uğur qazanmasını istəmir”

“Neftçi”nin yarımmüdafiəçisi Cordan Rezabalanın Futbolxeber.az saytına müsahibəsi

- Azərbaycan Premyer Liqasının VII turunda səfərdə “Zirə” ilə bərabərə qaldınız. 2:2-lik heç-heçə necə şərh edərdiniz?

- Qarşılaşmanı iki yerə bölərdim. İlk hissə istədiyimiz kimi alınmasa da, fasilədən sonra daha yaxşı oynadıq. İki qol vurub hesabda önə keçdik. Lakin hakimin penalti qərarı bizi çox məyus etdi. Çox istərdim ki, futbol ictimaiyyəti ilk hissədə mənə qarşı olan kobudluqla, qapımıza təyin edilən penaltini müqayisə etsin.

- Demək olar ki, hakim “Neftçi”nin qələbəsini əlindən aldı?

- Əlbəttə, qələbəyə layiq idik. Yekunda 2:2-lik bərabərlik qeydə alınsa da, mən komandamızı qalib sayıram. Hakimliyə nəzər yetirmək lazımdır. İdarəçilik bərbaddır. 

- Sizcə, bu, nə vaxta qədər davam edəcək?

- “Neftçi” böyük klubdur. Çoxları “Neftçi”nin uğur qazanmasını istəmir. Baş məşqçimiz də bizimlə söhbətdə deyir ki, o qədər güclü olmalıyıq ki, hamıya qarşı mübarizə apara bilək.

- Bir müddət əvvəl “Araz-Naxçıvan”ın yarımmüdafiəçisi Felipe Santos müsahibəsində bildirmişdi ki, azərbaycanlı hakimlər ildən-ilə geriləyirlər. Siz də daha əvvəl Azərbaycanda çıxış etmisiniz. Bu fikirlə razısınız?

- Hakimlik həqiqətən də Azərbaycan futbolunda böyük problemlə çevrilib. Tək biz yox, bir neçə klub mütəmadi olaraq narazılığını bildirir. Əvvəlki oyunlara nəzər yetirsək, görərik ki, xeyrimizə olan penaltiləri vermirlər. Lakin şübhəli məqamlarda bizə qarşı sərt mövqe nümayiş etdirirlər, istər penalti olsun, istər qırmızı vərəqə. Hamı buna qarşı mübarizə aparmalıdır. Hakimliklə bağlı tədbir görülməlidir.

- “Zirə” ilə matçda demək olar ki, “Neftçi”yə gəldikdən sonra ən yaxşı oyununuzu sərgilədiniz. Bu performansı davam etdirə biləcəksiniz?

- Komandamızın oyununda inkişaf var. Mən də çalışıram səhvlərim üzərində işləyim. Hansı komandada oynadığımı bilirəm. “Neftçi” böyük klubdur və burada tələblər də böyükdür. Qarşıdakı matçlarda da “Neftçi”yə faydalı olmaq üçün əlimdən gələni edəcəyəm.

İBRAHİM