Musa Qurbanlı: “Azarkeşlərin atama olan sevgisi, inamı ilə fəxr edirəm”

“Ayxan Abbasovun millinin baş məşqçisi təyin edilməsi qərarını yaxşı qarşıladım. Bizim üçün də yerli mütəxəssislə işləmək xoşdur”.

Futbolxeber.az saytına açıqlamasında bu sözləri “Qarabağ”ın və milli komandamızın hücumçusu Musa Qurbanlı deyib.

O, Abbasova güvəndiklərini bildirib: “Ayxan müəllim qısa müddətdə milliyə rəhbərlik etsə də, Ukrayna ilə matçda heç-heçə oynadıq. Halbuki cəmi bir gün vaxtı var idi. Bununla belə, kollektivi yaxşı hazırladı, güclü rəqibdən xal ala bildik. Düşünürəm ki, baş məşqçinin yerli mütəxəssis olması komandaya fayda verəcək. Bir-birimizi daha yaxşı anlayacağıq. Ayxan Abbasov da oyunçuları ayrı-ayrılıqda daha yaxşı tanıyır, hamımızın bacarığına, xarakterinə bələddir. Ayxan müəllimə uğurlar arzulayıram. Ümid edirəm ki, həm onun üçün, həm də millimiz üçün bu seçim uğurlu olacaq”.

23 yaşlı futbolçu DÇ-2026-nın seçmə mərhələsi çərçivəsində qarşıdakı Fransa və Ukrayna ilə səfər matçları barədə də danışıb: “Fransa kimi rəqibin gücünü siz də bilirsiniz. Nəsə deməyə ehtiyac da yoxdur. Nə demək olar? Maksimum dərəcədə mübarizə aparmalı və əzmkarlıq göstərməliyik”.

Qurbanlı millinin hər uğursuz çıxışından sonra sosial şəbəkələrdə insanların Qurban Qurbanovu milli komandanın baş məşqçisi kimi görmək istəyinə belə münasibət bildirib: “Azarkeşlərin belə fikirlər səsləndirməsi, Qurban Qurbanova etimad göstərməsi, həm baş məşqçim, həm də atam olaraq mənim üçün çox xoşdur. Azarkeşlərin sevgisi, inamı, güvəni görünür. Bununla fəxr edirəm. Amma ayrı-ayrı işlərdir. "Qarabağ"da illərdir çalışır, oturuşmuş sistemi, işi var. Millidə çətinliklər olacaq. Amma mənim üçün fərqi yoxdur. Atam olaraq, istəyərdim ki, həm onun üçün, həm də futbolumuz üçün xeyirlisi nədirsə, o da olsun”.

İBRAHİM