“Sabah”ın qolunu alqışlayan AFFA-nın vitse-prezidenti... - TƏƏSSÜRAT

Dünən uzun fasilədən sonra bölgədə futbol izləmək imkanımız oldu. Azərbaycan futboluna nabələd şəxs üçün qəribə səslənsə də, futbol cameəsi üçün adi hal idi – Şamaxıda Yevlaxın “Karvan”ı “Sabah”ı qəbul edirdi. Yəqin ki, komandalar bu sözümdən inciməzlər, heyif itirilən 90 dəqiqəyə. “Karvan” - “Sabah” matçı bu mövsüm izlədiyimiz bəlkə də ən maraqsız oyun idi. Bir tərəfdə 90 dəqiqə boyunca sönük görünən “Karvan”, digər tərəfdə meydanda gəzə-gəzə istədiyini edən “Sabah”...

“Neftçi”yə qarşı bütün komandalar xüsusi motivasiya ilə oynayırlar” – bu fikri tez-tez eşidirik. Dünən bunun bir daha canlı şahidi olduq. Bir tur əvvəl paytaxtda “Neftçi”nin qonağı olan “Karvan” 90 dəqiqə inanılmaz əzmkarlıq nümayiş etdirmişdi. Komanda sanki ölüm-dirim matçına çıxmışdı. Lakin dünən həmin kollektivdən əsər-əlamət yox idi. Əminliklə söyləmək olar ki, “Karvan” “Neftçi”yə qarşı nümayiş etdirdiyi əzmkarlığın heç 10 faizini “Sabah”a qarşı ortaya qoymadı. Böyük ehtimal, bunda rəqibin erkən qol vurmasının da rolu oldu. Adətən autsayder komandalar qapılarını bir müddət toxunulmaz saxlayarkən özünəinamları artır...

“Karvan”dan söz düşmüşkən, daha əvvəl dəfələrlə bu komandanın Premyer Liqaya hazır olmadığını qeyd etmişdik. Dünən şahidi olduğumuz bir məqam bu fikri bir daha təsdiqlədi. “Karvan”ın avtobusunun olmaması böyük problem deyil. Son mövsümün bürünc medalçısı “Araz-Naxçıvan” da icarə avtobusda oyunlara yollanır. Lakin “Karvan”da vəziyyət daha acınacaqlıdır. Təsəvvür edin ki, komanda Şamaxıya icarəyə götürülmüş iki “Sprinter”lə gəlmişdi. Oyundan sonra “Karvan”ın inzibatçılarının idman ləvazimatlarını yığdıqları “Sprinter”lərin üzərində “İcarə - Gəncə-Yevlax” sözlərini görmək qəribə mənzərə idi... Hətta “Karvan”ın futbolçularından biri (etika xatirinə adını qeyd etmirik) Bakıya “Sabah”ın avtobusunda qayıtmaq istəyirdi. Lakin klub rəsmilərindən “baş məşqçi elə şeyə icazə vermir” cavabını aldıqdan sonra sonra başqa nəqliyyat vasitəsi axtarışına çıxdı.

Oyunu stadiondan izləyənlər arasında AFFA-nın vitse-prezidenti Balakişi Qasımov da var idi. O, matça “Sabah”ın prezidenti Maqsud Adıgözəlov və idman direktoru İqor Ponomaryovla birgə tamaşa edirdi. B.Qasımov “Sabah”a yaxınlığı ilə tanınsa da, sənəd üzərində onu paytaxt klubuna heç nə bağlamır. Buna baxmayaraq, “Sabah” hesabı açdıqdan sonra Balakişi müəllim sevincini alqışlarla büruzə verdi. Belədə istər-istəməz sual yaranır: əgər Balakişi Qasımovun “Sabah”a bağlılığı yoxdursa, nə üçün komandanın qolunu belə sevinclə qeyd edir? Tərslikdən "Karvan" da qol vurmadı ki, Qasımovun bu dəfə hansı reaksiya verəcəyini görək...

İBRAHİM