Azər Həşimov: “Əvəzetmələrlə oyunu dəyişməyə çalışdıq, amma alınmadı”

“Karvan-Yevlax” bu gün Azərbaycan Premyer Liqasının 7-ci turunda “Sabah”la qarşılaşıb və 0:2 hesabı ilə məğlub olub.

Futbolxeber.az saytının məlumatına görə, matçdan sonra Yevlax klubunun baş məşqçisi Azər Həşimov jurnalistlərin suallarını cavablandırıb.

O bildirib ki, ikinci hissədə komandası hücum cəhdləri etsə də, nəticə əldə edə bilməyib: “İkinci hissədə qol vurmaq üçün çalışdıq, qapı tirindən dönən topumuz oldu. Əvəzetmələrlə oyunu dəyişməyə çalışdıq, amma alınmadı. “Sabah”ı qələbə münasibətilə təbrik edirəm”.

O, qapıçı Kamran İbrahimovun çıxışını da dəyərləndirib: “Kamran bu gün yaxşı oynadı. Bir penaltidən qol buraxdı, digər qol isə topun “doqquzluğa” daxil olması ilə oldu. Həmin vəziyyətdə başqa qapıçı da olsaydı, həmin qolu buraxacaqdı”.