“Əvvəl İsveçə qalib gəlirdik, indi isə Azərbaycan millisi üçün asan oyun yoxdur”

“İndiki Azərbaycan millisi üçün asan oyun yoxdur. Halbuki əvvəl İsveç millisinə qalib gəlirdik”.

Futbolxeber.az saytına müsahibəsində bu sözləri milli komandamızın qapıçısı Şahruddin Məhəmmədəliyev Azərbaycan yığmasının DÇ-2026-nın seçmə mərhələsi çərçivəsində İslandiya və Ukraynaya qarşı keçirəcəyi oyunlar barədə danışarkən deyib.

O bildirib ki, qarşıdakı oyunlarda uğur qazanmaq üçün mütləq meydanda döyüşmək lazımdır: “İsveçlə oynayanda belə komandada inam var idi ki, qalib gələ bilərik. İndi isə... Limitin ləğvindən sonra milli üzvlərinin klublarda oyun praktikası azalıb. Ən çox yerli futbolçu “Qarabağ”da meydana çıxır. Odur ki, qarşıdakı görüşlər çox çətin keçəcək. Döyüşmək lazımdır. Ölkə üçün vuruşmalıyıq. Başqa variant yoxdur”.

Məhəmmədəliyev oyun praktikasının azlığına baxmayaraq, milliyə dəvət alması ilə bağlı səsləndirilən fikirlərə belə münasibət bildirib: “Hər zaman nədənsə narazı qalan insanlar var. Ona görə də sakitcə öz işimizi görməliyik. Danışmaq asandır. Mən gücümü meydanda göstərməliyəm. Oyunda nəyə qadir olduğumu sübut edəcəyəm. Nə qədər insan varsa, bir o qədər də fikir var. Odur ki, mən buna normal yanaşıram”.

Fərəc Aslanov