“Qarabağ”ın qapıçısı üsyan etdi: “XXI əsrdə necə süni qazonda oynamaq olar?”

“Qarabağ”ın qapıçısı Şahruddin Məhəmmədəliyev Azərbaycan Premyer Liqasının bəzi oyunlarının süni qazonda keçirilməsindən narazıdır.

Azərbaycan Premyer Liqasının üçüncü turunda Şamaxıda “Karvan”a qarşı keçirilən matçdan sonra Futbolxeber.az saytına müsahibə verən qolkiper bildirib ki, bu cür meydanlarda oyun keçirilməsi çox təhlükəlidir:

“Şərait hamı üçün eynidir. Lakin bu meydanlarla bağlı nəsə etmək lazımdır. Əgər futbolu inkişaf etdirmək istəyiriksə, başqa səviyyəyə keçmək lazımdır. Bu cür meydanlarda futbol oynamaq olmaz. Hamı bundan əziyyət çəkir. Anlamıram ki, XXI əsrdə necə süni qazonda oynamaq olar? Mənim üçün bu, anlaşılmazdır. Hətta uşaq vaxtı akademiyada belə bu cür meydanda oynamamışam. Yenə deyirəm, hamı üçün şərtlər yenidir. Lakin bu, futbolçular üçün çox təhlükəlidir. İlk növbədə bu stadionda ev oyunlarını keçirən komandalar üçün çətindir”.

Xatırladaq ki, ilk 3 turda "Şamaxı" ilə yanaşı, "Karvan" və "İmişli" də ev oyunlarını Şamaxı stadionunda keçirib. 

Fərəc Aslanov