Ayxan Abbasov: “Gənc oyunçularda stabillik həmişə olmur”

"Şamaxı" Azərbaycan Premyer Liqasının 3-cü turunda səfərdə "Sumqayıt"la 1:1 hesablı heç-heçə edib.

Futbolxeber.az saytının məlumatına görə, bölgə təmsilçisinin baş məşqçisi Ayxan Abbasov matçdan sonra keçirilən mətbuat konfransında əvvəlcə görüşlə bağlı fikirlərini açıqlayıb:

- Gərgin oyun olacağı bilinirdi. "Sumqayıt" çempionata çox yaxşı başlayıb. Bilirdik ki, onlar "Qarabağ"a qalib gələndən sonra çox inamlıdırlar. Biz də xal qazanmaq istəyirdik. Real epizodlar yalnız zərbələrlə olurdu. Öz qapımıza qol vurandan sonra futbolçuların reaksiya verməsi məni sevindirdi. Hesab 1:1 olandan sonra ən real epizodlar bizdə oldu. Hər iki komanda 1 xala layiq idi. Milli fasilə olacaq. Daha yaxşı olmalıyıq. Əlimizdə olan futbolçularla mübarizə aparacağıq.

- Qarşıda U-21 millisinin rəsmi oyunları gəlir. Komandanı hazırlamaq çətin deyil?

- Millidə tək deyiləm. Köməkçilərimlə birlikdə çalışırıq. Portuqaliya və Bolqarıstan millilərini təhlil etmişik. Özümüz üçün də bir yenilikdir. Amma böyük təcrübədir. Ümid edirəm ki, üzüağ çıxarıq.

- İki hücumçuya keçəndən sonra qol epizodları yaratdınız. Qarşıdakı matçlarda bundan istifadə edəcəksiniz?

- İki hücumçu ilə oynamağı sevirəm. Yoxlama oyunlarında da bunu sınamışıq. Belə gedişlər olacaq.

- Edqar Adilxanov bu gün qol vurdu. Bu, onun əvvəlki formasına qayıtmasına təkan olacaq?

- "Sabah"la matçda ondan razı qalmışdım. Gənc oyunçularda stabillik həmişə olmur. Hər şey nəzarətimizdədir. Edqarın böyük potensialı var. Onun gələcəkdə daha yaxşı olacağına inanırıq.