Elvin Bədəlov: “Belə oyunlarda yarım epizoddan da istifadə etməlisən”

“Neftçi”nin müdafiəçisi Elvin Bədəlovun Futbolxeber.az saytına müsahibəsi

- Səfərdə “İmişli” ilə heç-heçə oynadınız (0:0). Xal itkisinə səbəb nə oldu?

- Çətin oyun oldu. Belə olacağını gözləyirdik. Rəqib qapanmışdı. İki turdur məhz bu cür rəqiblərə qarşı oynayırıq. Çətinlik çəkdik. İlk hissə çox da yaxşı alınmadı. Fasilədən sonra daha da artırdıq. Oyunu dəyişməyə çalışdıq. İmkanlar olsa da, hesabı açmaq mümkün olmadı. Bu cür oyunlarda yarım epizoddan da istifadə etməlisən. Təəssüf ki, alınmadı.

- Qazonun süni olması işinizi nə dərəcədə çətinləşdirdi?

- Əlbəttə, belə qazonda oynamaq çətindir. Xüsusən də təzə gələn legionerlərimiz çox çətinlik çəkirdilər.

- “Neftçi”yə ümidlər böyük olsa da, start uğursuz alındı...

- Razıyam, iki heç-heçə uğursuz nəticədir. Başa düşürük ki, biz “Neftçi”yik, qalib gəlməliyik. Lakin komandanın 90 faizi yenidir. Bir az uyğunlaşmaq prosesi üçün vaxt lazımdır. Qəribə səslənsə də, bu, təbii haldır. İnşallah, bizi başa düşərlər.

- İlk turda beşli, ikincidə isə dördlü müdafiə ilə oynadınız. Hansı daha rahatdır?

- Mənim üçün heç bir fərqi yoxdur. Əsas meydanda məşqçinin tələblərini yerinə yetirməkdir. Komanda üçün nə yaxşı olacaqsa, mən istənilən tapşırığı yerinə yetirməyə hazıram.

- Növbəti turda “Turan Tovuz”la matçda uğursuzluğa son qoymaq mümkün olacaq?

- Onlar da beşli müdafiə ilə oynayırlar. Həmin matça ciddi hazırlaşmalıyıq. Bir şey fikirləşməliyik ki, vəziyyəti dəyişək, qələbə qazanaq.

- Azarkeşlərə nəsə demək istərdiniz?

- Əvvəlcə onlara təşəkkür etmək istəyirəm. İlk oyunda stadionda əla atmosfer var idi. Səfərə də gəlib bizə dəstək oldular. Təəssüf ki, onları sevindirə bilmədik. Həmişə yanımızda olsunlar, biz də növbəti matçlarda yaxşı nəticə qazanmaq üçün çalışacağıq.

Fərəc Aslanov