“Bir xal da bizim üçün xeyirlidir”

"Oyun gərgin alındı. Düşünürəm ki, 1 xal da bizim üçün xeyirlidir. Turlar keçdikcə özgüvənimizin daha da artacağına inanıram".

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının ilk turunda “Zirə” ilə 1:1-lik heç-heçə etdikləri oyundan sonra deyib.

Mütəxəssis UEFA Konfrans Liqasının üçüncü təsnifat mərhələsində “Omoniya”yə məğlubiyyətdən sonra klub rəhbərliyinin narazı qalması barədə fikrə belə münasibət bildirib: “Əlbəttə ki, "Omoniya" ilə matçdan sonra bizə təşəkkür etməməlidirlər. Öz iradlarını hər zaman bildirə bilərlər. Bunu normal qarşılamaq lazımdır. Komanda olaraq çox çalışdıq növbəti mərhələ üçün. Amma alınmadı. Bunu da komandanın təcrübəsizliyi ilə əlaqələndirmək olardı. Bizim üzərimizdə minimum vəzifə nə idisə, onu yerinə yetirməyə çalışdıq. Bu məğlubiyyətlər düzgün yanaşılanda, bizim faydamıza olacaq. Məşqçi işi daimi deyil. Nə vaxta kimi etibar edəcəklərsə, burada olub öz işimizi görəcəyik”.

“Həmin məğlubiyyətlərdən sonra komandanı toparlamaq sizə çətin olmadı?” sualını E.Baxşıyev belə cavablandırıb: “Təbii ki, məğlubiyyətlər psixoloji baxımdan çətindir. Sevindirici haldır ki, komandam bərkdir. Daha yaxşısını edə bilərik. Bunu bildiyimiz üçün də komanda şəklində iddiamızı ortaya qoyacağıq”.