“Oyunçularım yaxşı ustalıq göstərdilər”

“Çempionatın ilk oyunları ağır keçir. Oyunçularım yaxşı ustalıq göstərdilər. Favorit komandalardan birinə qarşı baxımlı oyun göstərdik. Düşünürəm ki, qələbəyə yaxın tərəf biz idik. Hesab 1:0 olarkən də, 1:1 olarkən də qol epizodlarımız var idi. Bunlardan istifadə edə bilmədik. Rəqib standart vəziyyətdən qol vurdu. Həmin epizodda da zəncirvari səhvlərimiz oldu. Ümumilikdə oyunçularımın göstərdiyi performansdan çox razı qaldım”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının ilk turunda “Araz-Naxçıvan”a qarşı keçirdikləri oyundan (1:1) sonra deyib.

“Sizcə, hakim oyunun nəticəsinə öz təsirini göstərdimi?” sualını o, belə cavablandırıb: “Oyun içində olan narazılıqlarımız təbiidir. Matçdan sonra biz də baxırıq, nəticəyə təsir edən epizodlar da olur. Qarşılaşma zamanı verilən reaksiyalar fərqli olur. Bəzən elə olur ki, həqiqətən oyunun gərginliyindən dolayı bəzi dialoqlar olur. Ümumilikdə bu oyunda hakimlikdən narazı qalmadım. Birinci hissədə vurduğumuz qol sayılmadı. Bu epizodda topun ələ dəyməsi bilmirəm necə yorumlanır. Demirəm ki, səhv qərardır”.

Mütəxəssis rəqib futbolçu Felipe Santosla aralarında yaşanan gərginliyə belə aydınlıq gətirib: “Top əlimdəydi. Santos sərt şəkildə götürdü. Bu, oyun zamanı futbolçular arasında olur. Bir mənlə qalmışdı bunu etmədiyi. Bu da oldu. Xasiyyəti belədir. Belə də qəbul etməliyik”.