Adil Şükürov: “Kəpəz” düzələcək”

“İlk oyunumuzda qələbə qazanmaq istəyirdik. Çox təəssüf ki, əlimizə düşən imkanlardan istifadə edə bilmədik və futbolun yazılmamış qanunu özünü göstərdi”.

Futbolxeber.az saytının məlumatına görə, bu sözləri “Kəpəz”in baş məşqçisi Adil Şükürov Azərbaycan Premyer Liqasının ilk turunda “Sumqayıt”a 0:3 hesabı ilə uduzduqları oyundan sonra deyib.

Mütəxəssis komandada çatışmazlıqlar olduğunu vurğulayıb: “İkinci qoldan sonra futbolçular ruhdan düşdülər və məğlub olduq. Heyət olaraq təzə yığılmışıq və tam formalaşmamışıq. Çatışmazlıqlarımız var və bundan sonra da işləməliyik və elə etməliyik ki, gələcəkdə bu cür oyunlardan xallar qazana bilək”.

Şükürov komandanın kapitanı Əli Səmədovun meydana çıxmamasına belə aydınlıq gətirib: “Əli komandanın kapitanı olaraq oyunçuların yanındadırsa, bu o demək deyil ki, hazırdır, ya hazır deyil. Sadəcə olaraq bu gün məşqçilər korpusu olaraq belə qərar verdik. Oyunçunun hazırlıqsızlığından söhbət gedə bilməz. Əksinə, bu gün ehtiyatda da olsa, komandanın yanında olması çox vacib idi”,

“Kəpəz”də bir çox dəyişiklər oldu. Amma komandanın oyununda irəliləyiş görsənmir. Sizcə, niyə?” sualını Gəncə klubunun çalışdırıcısı belə cavablandırıb: “Kəpəz” düzələcək inşallah. Qısa bir müddətdə çatışmazlıqları aradan qaldıracağıq. Azarkeşlər bizdən tam fərqli komanda gözləyirlər. Onlar bu komandanı görəcəklər”.