Balaəli “Qarabağ”ın qələbəsindən danışdı: “Komanda bu il ÇL-də daha da irəli gedəcək”

“Qarabağ” çox yaxşı oynadı. İnanıram ki, komanda bu il Çempionlar Liqasında Liqa mərhələsinə vəsiqə qazanacaq və daha da irəli gedəcək”.

Futbolxeber.az saytına açıqlamasında bu sözləri tanınmış meyxanaçı Balaəli deyib.

Dünən UEFA Çempionlar Liqasının üçüncü təsnifat mərhələsi çərçivəsində “Şkendiya”ya qarşı keçirilən görüşü (5:1) stadiondan canlı izləyən meyxanaçı da hamı kimi Ağdam klubunun yeni hücumçuya ehtiyac duyduğunu düşünür: “Bir hücumçu transferi lazımdır. Deyilənə görə, Klovis gəlir. O olsun, ya başqası, əsas odur ki, hücumçu alınsın. Düzdür, Nəriman Axundzadə də yaxşıdır, gənc hücumçudur. Amma ondan əlavə, daha bir forvarda ehtiyac var”.

O, Ağdam klubuna olan sevgisindən də danışıb: “Çoxdan “Qarabağ”a azarkeşlik edirəm. Uşaq vaxtı özüm də futbol oynamışam, cavanlıqda. Avropada oynayanda bütün klublarımıza azarkeşlik edirəm. Fərqi yoxdur, “Neftçi” olsun, “Zirə”, yaxud “Araz-Naxçıvan”. Amma “Qarabağ”ın yeri başqadır. Qarabağın adı bizim üçün əzizdir. Biz o ad uğrunda şəhidlər vermişik”.

“Qarabağ”la bağlı bir mahnı yazmaq fikriniz var?” sualını Balaəli belə cavablandırıb: “İnşallah olar. Problem yoxdur. Məndən yazmaqdır, qalanını amma deyə bilmərəm”. 

Fərəc Aslanov