Erkin İbrahimov “Kəpəz”dən gedir?

Dünən Gəncədə “Kəpəz”in fövqəladə iclası keçirilib.

Futbolxeber.az saytının məlumatına görə, əvvəldən planlaşdırılmayan toplantı Müşahidə Şurasının sədri Namiq Qədirovun istəyi ilə baş tutub. İclasda son ayyarımda görülən işlər müzakirə edilib.

Maraqlıdır ki, iclasda İdarə Heyətinin üzvü və sədrin idman məsələləri üzrə müşaviri Erkin İbrahimov iştirak etməyib. Bu isə müəyyən söz-söhbətlərə yol açılıb. İbrahimovun hətta “Kəpəz”dən ayrılmaq üzrə olduğu barədə xəbər də yayılıb.

Tanınmış menecer saytımıza açıqlamasında yayılan xəbəri təkzib edib. İbrahimov bildirib ki, həmin günü Bakıda olmalı idi: “Çünki heyətə qatılacaq yeni futbolçu və onun meneceri ilə paytaxtda görüşməli idim. Menecer ölkəmizə yalnız 1 günlük gəldiyindən sənədləşmə işləri və futbolçunun müayinəsi Gəncədə yox, Bakıda həyata keçirildi. Bu səbəbdən də Gəncədəki iclasda iştirak edə bilmədim”.