Millimiz ağ günə çıxdı, qaldı “İmişli”...

“Səbail” Premyer Liqadan düşməmiş “ASCO Arena”ya göz dikən, 2 ildir stadionunu ağ günə çıxarda bilməyən, mövsümün startına 2 aydan da az qalmış ev oyunlarını harada keçirəcəyi naməlum olan “İmişli” Portuqaliyadan baş məşqçi gətirib. Əslində bu söhbət çoxdan var idi, bu gün rəsmiləşdi. “Stadion bizim deyilsə, niyə xərc çəkək” deyərək İmişli stadionunu Premyer Liqa üçün hazır vəziyyətə gətirmək istəməyən klub rəhbərliyi Portuqaliya aşağı liqasından gələn baş məşqçi üçün “xərc çəkməkdən” çəkinmir. Nə deyək, xeyirlisi...

Amma və lakin bu təyinatın kluba, futbolumuza hansısa xeyir verəcəyi çox böyük sual altındadır. Portuqaliyanı Avropa çempionluğuna daşıyan Fernandu Santuş Azərbaycan millisində nə iş gördü? Santuşun uğur qazana bilmədiyi yerdə ölkəsinin aşağı liqasından gələn portuqaliyalının “İmişli”də möcüzə yaradacağını gözləmək sadəlövhlük olardı. İkincisi də, “İmişli”nin yeni mövsüm üçün hədəfi nədir? Ən yaxşı halda Premyer Liqada qalmaq. Bu halda Portuqaliyadan məşqçi(lər) gətirməyə nə ehtiyac var ki? Məgər “İmişli” Premyer Liqada qalmaq uğrunda Tərlan Əhmədov, Arif Əsədov, Şahin Diniyev, Mahmud Qurbanov, Samir Əliyev, Azər Bağırov və digər azərbaycanlı məşqçilərlə mübarizə apara bilməz? Bilər, özü də 5 dəfə artıq. 

Əslində, “İmişli”ni qınamırıq da. AFFA rəhbərliyi Avropada heç kimə lazım olmayan Fernandu Santuşa milyonlar yedizdirirsə, “İmişli”nin də heç bir ciddi hədəf olmayan yerdə başqa bir portuqaliyalıya onminlər, yüzminlər xərcləməsi normaldır. AFFA necədirsə, Premyer Liqaya buraxdığı yeni klub da o cürdür.

1 ildən çoxdur futbolumuzu idarə edənlər nə iş görüblər ki? Əvvəl “strategiya yazılır” nağılı ilə millətin başını qatanlar indi kölgəyə çəkiliblər. Hə, milyonlarla dollar verib strategiya yazırdırdınız, bəs sonra? Əsas məsələ yazılanları icra etməkdir...

İcra etmək bir qırağa, AFFA rəhbərliyi adicə normal qərarları da qəbul edə bilmir. Dünən gözümə I Liqaya vəsiqə qazanan “Şəfa”nın baş məşqçisi Elgiz Kərəmlinin açıqlaması sataşdı: “I Liqanın başlama tarixi müəyyənləşmədiyindən planlaşdırma edə bilmirik”. Nə qədər qəribə olsa da, iyun ayı yekunlaşmaq üzrədir, lakin Azərbaycan I Liqasında nəinki mövsümün start tarixi, heç legioner limiti də bilinmir. Mətbuat həftənin tək günləri “limit 8+3 olacaq”, cüt günləri də “limit 7+4 olacaq” yazır... Bu barədə qərar qəbul etməli olan AFFA İcraiyyə Komitəsi isə hələ də gözləyir... Nəyi... Kimi... bax bu, naməlumdur.

İbrahim Cəfərov