Qurban Qurbanov: “Hamımız ona dəstək üçün gəlmişik”

Azərbaycan Minifutbol Federasiyasının təşkilatçılığı ilə Bakıda keçiriləcək dünya çempionatına həsr olunan “Legends Cup”da “Neftçi 2000-lər”lə görüşdə “Premyer Liqa məşqçiləri”nin heyətində meydana çıxan Qurban Qurbanov təəssüratlarını bölüşüb.

Futbolxeber.az saytına açıqlamasında “Qarabağ”ın baş məşqçisi oyunun maraqlı keçdiyini bildirib:

“Çoxdadır belə bir şəraitdə, bu cür atmosferdə oynamamışdım. Düzdür, bir qədər ağır idi. Çünki formamızdan uzağıq. Bununla belə, futbolçuların ustalığını gördük. Çoxdan görmədiyim veteranları gördüm, zarafatlaşdıq, keçmiş günləri xatırladıq. Hamı üçün maraqlı oyun oldu”.

“Qarabağ”ın baş məşqçisi olsa da, Qurban Qurbanov da “Neftçi”nin 2000-lərdəki əfsanələrindəndir. Görəsən, təcrübəli mütəxəssis “Premyer Liqa məşqçiləri”nin deyil, “Neftçi 2000-lər”in heyətində oynamaq istəyərdimi?

“Mən “Neftçi”dən oynamaq istəyərdim. Bəlkə də hər hissə bir komandanın formasını geymək olardı. Lakin sistem belə qurulmuşdu. Bizim komandanın heyəti Premyer Liqa klublarının məşqçilərindən formalaşmışdı. Ümumi götürdükdə, ciddi fərqi yoxdur. Hamımız Azərbaycan Minifutbol Federasiyasına, Orxan Məmmədova dəstək üçün gəlmişik. Hər şey super alındı”.

Fərəc Aslanov