Bəhlul Mustafazadə: “Hər çempionluğun öz hekayəsi var”

“Hər çempionluğun öz hekayəsi var. Bundan əlavə, hər çempionluğun arxasında çox böyük zəhmət dayanır”.

Futbolxeber.az saytının məlumatına görə, bu sözləri “Qarabağ”ın müdafiəçisi Bəhlul Mustafazadə komandasının 12-ci çempionluğunu şərh edərkən deyib.

O, növbəti mövsüm üçün hədəflərini açıqlayıb: “Bu mövsüm çox çalışdıq. Avroliqada bir qədər uğursuz olsaq da, bütün fikrimizi ölkə çempionluğuna yönəltdik. Gələn mövsüm də hədəfimiz çempion olmaq və avrokuboklarda daha yaxşı nəticə qazanmaqdır”.

Mustafazadə bildirib ki, bundan sonra bütün fikirləri kubokun finalı ilə bağlıdır: “Çempionluğu əvvəlcədən qeyd eləmişik. Artıq medallarımızı da aldıq. Bundan sonra bütün fikrimizi kubokun finalına yönəldəcəyik. Kuboku da qazansaq, daha yaxşı qeyd edərik”.

Təcrübəli müdafiəçi məqsədlərinin finalda qalib gəlmək olduğunu vurğulayıb: “Maksimum dərəcədə ciddi hazırlaşırıq. Məqsədimiz finalda qələbə qazanmaqdır. Ümid edirəm ki, kuboku da qazanacağıq”.

Sonda B.Mustafazadə baş məşqçi Qurban Qurbanovla münasibətlərinin hansı səviyyədə olması barədə sualı cavablandırıb: “Hər şey yüksək səviyyədədir. Münasibətimiz əladır”. 

Fərəc Aslanov