Emmanuel Hakman: “İnanırıq ki, Konfrans Liqasına yollanacağıq”

“Yaxşı matç keçirdik. Çətin olsa da, qalib gəldik. 3 xalı gözəl oyunla əldə etdik”.

Futbolxeber.az saytına müsahibəsində bu sözləri “Turan Tovuz”un müdafiəçisi Emmanuel Hakman Azərbaycan Premyer Liqasının 35-ci turunda “Sumqayıt”ı 1:0 hesabı ilə məğlub etdikləri oyun barədə danışarkən deyib.

Toqolu müdafiəçi bildirib ki, 4-cü yeri təmin etsələr də, mövsümün son turuna da qələbə üçün çıxacaqlar: “Sumqayıt”a qalib gəlməklə dördüncü yeri təmin etdik. Lakin arxayınlaşmırıq. Çempionat hələ bitməyib. Qarşıda daha bir matçımız var. “Kəpəz”lə görüşdə də qələbə qazanaraq azarkeşlərimizi sevindirmək istəyirik”.

Hakmanın sözlərinə görə, avrokuboklara yollanmaq üçün bütün ümidləri “Qarabağ”adır: “Təbii ki, finalda “Qarabağ”ın qalib gəlməsini istəyirik. Yalnız bu halda Konfrans Liqasına yollana bilərik. İnanırıq ki, belə də olacaq”.

30 yaşlı futbolçu “Turan Tovuz”un cari mövsümdəki çıxışından razı qaldınız?” sualını belə cavablandırıb: “Məncə, bundan artığına da nail ola bilərdik. Təəssüf ki, müəyyən səbəblər istəyimizə mane oldu. Xüsusən də aparıcı futbolçularımızın zədələnməsini qeyd etmək olar”.

Hakman sonda vurğulayıb ki, yeni mövsümdə də Tovuz klubunun formasını geymək istəyir: “Bəli, müqaviləm başa çatır. İndidən gələcəklə bağlı dəqiq fikir bildirməkdə çətinlik çəkirəm. Əlbəttə, mən komandada qalmaq istəyirəm. “Turan Tovuz”dakı durum məni qane edir”.

Fərəc Aslanov