Əmrah Çəlikəl: “Çempionluq adiləşib” demək insafsızlıq olar”

“Çempionluq adiləşib” demək insafsızlıq olar. Əlbəttə, çempionluq çox böyük sevincdir. Bu il də bu sevinci yaşadığımız üçün xoşbəxtəm. İnşallah, davamı olsun, 13, 14, 15-ci çempionluğu qazanaq. Açığı, mən üçüncü ulduzu da görmək istəyirəm”.

Futbolxeber.az saytının məlumatına görə, bu sözləri “Qarabağ”ın direktoru Əmrah Çəlikəl komandasının 12-ci çempionluğunu şərh edərkən deyib.

O, mayın 31-də keçiriləcək ölkə kubokunun finalında da qalib gəlmək istədiklərini vurğulayıb: “Əlimizdən gələni edəcəyik. Komandamız meydana böyük motivasiya ilə çıxacaq. Avrokuboklar öncəsi kuboku qazanmaq bizim üçün stimul olar”.

Klub rəsmisi yayda heyətin güclənəcəyini söyləyib: “Mütləq transferlər olacaq. Ancaq bu barədə planlarımız kubokun finalından sonra dəqiqləşəcək”.

“Legioner limitinin ləğvi “Qarabağ”ın transfer siyasətinə təsir edəcək?” sualını Ə.Çəlikəl belə cavablandırıb: “Əlbəttə, hamıya necə, bizə də elə. Limitin ləğvi transferlərə təsir göstərəcək”.