“Hələ özümü məşqçi hesab etmirəm”

“Hələ ki özümü məşqçi hesab etmirəm. Biz özümüzü məşqçi hesab etsək, neçə illərdir nəticə qazanan məşqçilərə hörmətsizlik etmiş olarıq. Vüqar Mustafayev karyerasını başa vurdu. Ona ən xoş arzularımı çatdırıram. Biz demək olar ki, heç nə etməmişdik. Futbolçular sağ olsunlar, meydana çıxıb özləri oynadılar. Sonuncu ev oyunumuz idi. Azarkeşlərə yaxşı nəticə hədiyyə etmək istəyirdik. Amma olmadı”.

Futbolxeber.az saytının məlumatına görə, bu sözləri “Sumqayıt”ın məşqçisi Vurğun Hüseynov Azərbaycan Premyer Liqasının 35-ci turunda “Turan Tovuz”a 0:1 hesabı ilə uduzduqları oyundan sonra deyib.

Daha sonra o, jurnalistlərin suallarını cavablandırıb:

- Baş məşqçi olmaq istəyərsiniz?

- Neçə il futbol oynamışam. Amma məşqçilik tam başqa bir şeydir. Həqiqətən çox çətindir. Futbol oynamağa nə var ki? Məşqçi bütün kollektivə cavabdeh olmalıdır. Bunun üçün böyük təcrübə lazımdır. Məşqçi ola bilməsəm, başqa sahəyə yönələcəyəm.

- Məğlubiyyətin səbəbi nə idi? Vaqif Cavadovun gedişi komandaya necə təsir etmişdi?

- Vaqif müəllimə uğurlar arzulayıram. Məşqçi işi belədir. Bu gün işləyirsən, sabah işləmirsən. Futbolçular peşəkardır. Onların üzərinə düşən odur ki, meydana çıxıb mübarizə aparsınlar.