Sabiq “Neftçi”li: “Birlikdə işlədiyim ən yaxşı məşqçi Bordindir"

"Neftçi"nin sabiq futbolçusu Kiril Petrov Bakı Azərbaycanda oynadığı dövrü xatırlayıb.

Futbolxeber.az saytının məlumatına görə, 2017-2019-cu illərdə paytaxt klubunun formasını geyinən 34 yaşlı hücumçu bu barədə ukrfootball.ua-ya müsahibəsində danışıb.

O deyib: "Deyə bilərəm ki, Azərbaycanda bu qədər vaxt keçidiyim üçün şadam. Avropa Liqasında oynadım. "Qarabağ"a cəmi 1 dəfə uduzmuşduq. Orada yaxşı dostlar qazandım. Azərbaycan yaxşı ölkədir. Bakı və insanları gözəldir. Azərbaycandan mənə yalnız müsbət emosiyalar qalıb".

K.Petrov komanda yoldaşları arasında yaxşı münasibətin olduğunu bildirib: “Komandada hamı mehriban idi. Uzaq ölkələrdən gələn legionerlər də vardı. Bir-birimizi yaxşı başa düşməsək də, zarafatlaşmaq üçün dil tapırdıq. Bəzən asudə vaxtlarımızı birlikdə keçirirdik. Bizi komanda ziyafətlərinə toplayan italyan məşqçimiz var idi. Bir bokal pivə və ya bir qədəh şərab içməyə icazə verirdilər. Amma müsəlmanlara icazə verilmədiyi üçün biz onlarla fərqli masalarda əyləşirdik. Birlikdə işlədiyim ən yaxşı məşqçi isə Roberto Bordindir. "Neftçi"də onun baş məşqçiliyi altında oynamışam".