Azər Bağırov: “Bu nəticə "Kəpəz" üçün çoxdur”

“Azarkeşlərimizə təşəkkür edirəm. İkinci hissə istədiyimiz kimi oldu. İlk yarıda qol buraxdıq. Fasilədən sonra istədiyimiz futbolçulardan istifadə edərək önə keçdik. Təəssüf ki, son dəqiqələrdə penaltidən qol buraxdıq. Amma üzülməyə dəyməz. Əsas odur ki, bu gün xallarımızın üstünə xal gəldi. Futbolçularım meydanda əsl qladiator kimi döyüşdülər”.

Futbolxeber.az saytının məlumatına görə, bu sözləri “Kəpəz”in baş məşqçisi Azər Bağırov Azərbaycan Premyer Liqasının 33-cü turunda “Neftçi”yə qarşı keçirilən oyundan (2:2) sonra deyib.

Daha sonra o, jurnalistlərin suallarını cavablandırıb:

- Ötən mövsüm "Araz-Naxçıvan"ın baş məşqçisi olanda "Neftçi" ilə oyunun fasiləsində 4 əvəzetmə etdiniz və ikinci hissədə qol vurub qələbə qazandınız. Bu gün də fasilədə 4 əvəzetmə etdiniz. Bu, "Neftçi"nin zəif cəhətlərini bilməyinizdən irəli gəlir?

- Bəli. Birinci hissədə meydanda daha çox siyasi gedişlər edirdik. Rəqibi üzərimizə çəkdik. İkinci hissədə sürətli oyunçuların hesabına əks-hücumlarımız daha təhlükəli oldu. Meydana hücumameyilli 4 futbolçu buraxdıq. Eyni anda 4 dəyişiklik edəndə rəqibi fiziki baxımdan hazırlıqsız tutursan.

- "Neftçi"dən səfərdə xal almaq pis nəticə sayılmamalıdır. Matç bitəndən sonra futbolçularınız heç-heçəyə görə çox məyus idilər. Bunu necə şərh edərdiniz?

- Heç kim istəməz ki, əlavə olunan dəqiqələrdə qol buraxsın. Həqiqətən də üzüntülü məqamdır. Qələbə qazansaydıq, çempionatda qalmağı rəsmiləşdirəcəkdik. Qışdan sonra ən çox xal toplayan 3-4 komandadan biriyik. Məncə, bu imkanlarda bu nəticə "Kəpəz" üçün çoxdur.