Elvin Məmmədov: “2 xal itirdik”

“Bilirdik ki, bizi ağır oyun gözləyir. Şamaxı hər komanda üçün çətin səfərdir. Ayxan Abbasovun həmişə döyüşkən komandası olur. Birinci hissədə oyuna tam köklənə bilmədik. Amma ikinci yarıda yaxşı mübarizə aparıb qol vurduq. Qollar da vura bilərdik. Qarşıdakı 3 oyuna hazırlaşacağıq”.

Futbolxeber.az saytının məlumatına görə, bu sözləri “Səbail”in baş məşqçisi Elvin Məmmədov Azərbaycan Premyer Liqasının 33-cü turunda “Şamaxı”ya qarşı keçirilən oyundan (1:1) sonra deyib.

Daha sonra o, jurnalistlərin suallarını cavablandırıb:

- Epizodları dəyərləndirə bilməməyi nə ilə əlaqələndirirsiniz?

- Ustalıq səviyyəsi də ola bilər, şanssızlıq da. İdman xoşbəxtliyi də olmalıdır. Uşaqlar həqiqətən də mübarizə apardılar. Keçmiş qaldı keçmişdə. Qaytara bilmərik.

- Rüfət Abdullazadənin əvəzlənməsinin səbəbi nə idi?

- Ağrıları oldu deyə özü istədi.

- 1 xala sevindiniz, yoxsa itirilən 2 xala məyus oldunuz?

- Məşqçiliyə yeni başlamışam. Böyük danışmaq istəmirəm. Amma reallığa baxsaq, həm "Araz-Naxçıvan"la, həm də "Şamaxı" ilə oyunda 2 xal itirdik. Əlbəttə ki, məyus oluruq.