Bəhlul Mustafazadə: “Deməzdim ki, çempionluğu sakit qarşıladıq”

“Maraqlı oyun keçdi. Hər iki komandanın qol şansları var idi. Qalib də gələ bilərdik. Yekunda 1 xalla kifayətləndik”.

Futbolxeber.az saytının məlumatına görə, bu sözləri “Qarabağ”ın müdafiəçisi Bəhlul Mustafazadə Azərbaycan Premyer Liqasının 32-ci turu çərçivəsində “Sabah”a qarşı keçirilən oyun (1:1) haqda danışarkən deyib.

O, budəfəki çempionluğu daha sakit qarşılamaları fikri ilə razılaşmayıb: “Deməzdim. Sadəcə bilirdik ki, bizi heç-heçə də qane edir. Qazanılan 1 xalla çempionluğumuzu rəsmiləşdirdik. Təbii ki, buna görə çox sevinirik”.

B.Mustafazadə kubokun finalının çempionat matçından fərqlənəcəyini bildirib: “Bu matçda baş məşqçimiz fərqli heyətə üstünlük vermişdi. Lakin kubokun finalı fərqli olacaq. Məncə, finalda hər iki komanda daha aqressiv oynayacaq. Biz də kuboku qazanmaq istəyirik, rəqib də. Buna görə də final çox gərgin keçəcək”.