Tahir Gözəl: “Məşqçimiz hansı futbolçuları istəsə, ona tam dəstəyik”

“Çətin və bir o qədər də gözəl çempionat oldu. Hiss olunur ki, hər il çempionatın keyfiyyəti qalxır. Hakimlərimizdən mən çox razıyam. "Qarabağ" hər il gücləndiyini bir daha sübut etdi. Avropadakı uğursuzluğumuzdan sonra bu çempionluq bizi çox sevindirdi”.

Futbolxeber.az saytının məlumatına görə, bu sözləri "Qarabağ"ın prezidenti Tahir Gözəl Azərbaycan Premyer Liqasının 32-ci turunda "Sabah"la keçirilən və komandanın çempionluğu rəsmiləşdirdiyi oyundan (1:1) sonra jurnalistərə açıqlamasıda deyib.

O, komandanın bundan sonrakı planlarından danışıb: "Gələcəyimiz biraz bəxtimizdən asılıdır. Görək, püşkatmadan bizə hansı komandalar çıxacaq. Hamıya məlumdur ki, mənimlə Qurban hocanın arasında möhtəşəm mənəvi birlik var. Bir-birimizi gözəl başa düşürük. O, bilir ki biz həmişə onun yanındayıq. Sponsorumuz hər zaman bizə dəstəkdir. Məşqçimiz hansı futbolçuları istəsə, ona tam olaraq dəstəyik. "Sabah"la kubokun final matçı var. O matçdan sonra, Qurban hoca ilə görüşümüz olacaq. Hansı futbolçuların gedəcəyi və yeni futbolçuların alınması barədə müzakirəmiz olacaq. Çempionlar Liqasında olmağımız bizim üçün hər tərəfdən müsbət haldır. Mən komandaya hədəf qoymuram. Onlar özləri bilir ki, əsas məqsəd Azərbaycana ilham verən bir oyun sərgiləmək və ölkəmizin adını layiqincə təmsil etməkdir".

Legioner limitinin ləğvi ilə bağlı danışan klub rəhbəri uşaq futboluna daha çox diqqət ayıracaqlarını bildirib: "Mən belə düşünürəm ki, limitin ləğv olunnması bizə qısamüddətli kömək edir. Azərbaycan futbolunu sevən biri kimi deyə bilərəm ki, mən uzunmüddətli inkişafın dəstəkçisi olaraq limitin ləğv olunmasının tərafdarı deyiləm. Buna baxmayaraq, biz uşaq futboluna öz dəstəyimizi və diqqətimizi daha çox yönəldəcəyik. Biz özümüzə hədəf qoymalıyıq ki, öz daxilimizdə limit olsun".

T.Gözəl oyundan sonra, paltardəyişmə otağında futbolçuları qucaqladığını deyib: "1-2 dəqiqə xoşbəxtlikdən özümə gələ bilmədim. Hamısını qucaqladım, öpdüm. Hər-kəsi bir-bir təbrik etdim. Bu, bizim üçün böyük sevinc idi".

"Qarabağ" Azərbaycan kubokunun finalında yenidən "Sabah"la qarşılaşacaq. T.Gözəl bu matçı "şirlərin savaş"ı adlandırıb: "Mən bilirəm ki, "Sabah" həmin oyuna çox güclü hazırlaşacaq. Onların avrokuboklara getmək üçün son şansıdır demək olar. Buna görə də, "şirlərin savaşı" adlandıracağımız matç olacağına inanıram”.