Ayxan Abbasov: “2 xal itirən biz olduq”

“Çətin və maraqlı oyun oldu. Hər iki komanda qalib gəlmək istəyirdi. Birinci hissədə mübarizə daha çox meydanın mərkəzində getdi. İkinci yarıda futbolçularımdan sürətli hücumlar görmək istəyirdim. İkinci hissəyə baxsaq, 2 xal itirən biz olduq. Komandamdan razı qaldım. Xallarımızın üstünə xal gəldi. Rəqibin üstün cəhətlərini bilirdik. Elə bundan da qol vurdular. Ondan sonrakı standart vəziyyətlərdə futbolçularım yaxşı çıxış etdilər. Hər xal bizim üçün vacibdir. Çalışırıq ki, daha yuxarı pillələrə qalxaq”.

Futbolxeber.az saytının məlumatına görə, bu sözləri “Şamaxı”nın baş məşqçisi Ayxan Abbasov Azərbaycan Premyer Liqasının 32-ci turunda “Turan Tovuz”la bərabərə qaldıqları (1:1) oyundan sonra deyib.

Daha sonra o, jurnalistlərin suallarını cavablandırıb:

- Leroy Mikels zədədən sonra qayıtdı və onu bu gün fərqli mövqedə oynatdınız. Performansını bəyəndiniz?

- Sistemə baxsanız, mövqeyi hücum görünürdü. Amma oyunun içində bəzi detallar var idi. Məncə, tapşırıqları yerinə yetirdi. İkinci hissədə daha yaxşı idi. Tam hazır deyil. Amma Leroya inanırıq. Zədədən sonra pis performans göstərmədi.

- 1-ci Liqada və Əvəzedicilər Liqasında U-21 millisi üçün futbolçular tapa bilirsiniz?

- Əvəzedicilər Liqasında daha çox 2006-2007-ci il təvəllüdlü futbolçulara baxıram. Onlar bizim gələcəyimizdir. I Liqa maraqlı oldu. "İmişli" - "Qəbələ" matçını izlədim. Yaxşı mənada təəccübləndim. Oyunçular var. Əvəzedicilər liqasından da bəyəndiyimiz futbolçu var. "Şamaxı"ya gətirmək istəyirik. İnanmaq lazımdır. Bu gün Rüfət Abbasovla Edqar Adilxanov göz qabağındadır. Çempionatda stabil oynayırlar. Rauf Rüstəmlinin bugünkü performansına baxın. Azərbaycanda ən yaxşı dayaq yarımmüdafiəçilərindən ola bilər.

- Klublardan tez-tez yerli futbolçu qıtlığı ilə bağlı şikayət eşidirik. Bu gün "Şamaxı"da 90 dəqiqə meydanda olan 5 yerlidən 3-ü ötən mövsüm Birinci Liqada, digəri isə Əvəzedici Liqada çıxış edirdi. Bu o anlama gəlir ki, günah yerli futbolçularda yox, onlara lazım olan şansı verməyən klublardadır?

- Razıyam. İnanmaq lazımdır. Burada futbolçuların da günahı var, klubların da. Tez bir zamanda nəticə qazanmaq istəyirik. Bəzi klublar fəlsəfələrini öz büdcələrinə uyğun seçməlidir. I Liqadan gələn komanda fikirləşir ki, 10 legioner gətirib oynadaq. Amma hansını əziyyəti olan yerli oyunçular var. Biz "Turan Tovuz"a gələndə I Liqadakı heyətdən 13 futbolçu saxladıq. Faiq Hacıyev bu gün göz qabağındadır. "Turan Tovuz"da əsas heyətin üzvüdür.