“Mingəçevir”ə qarşı ikili münasibət

“Əsassız məlumatların hardan yarandığını deyə bilmərəm. Baş məşqçinin qarşısına bu mövsüm komandanı 1-ci Liqada saxlamaq tələbi qoyulub. Füzuli müəllim işinin öhdəsindən lazımınca gəlir. Heyətə və nəticələrə baxsaq, hər şey göz qabağındadır. İşinin öhdəsindən artıqlamasıyla gələn məşqçidən rəhbərliyin narazı olması mümkün deyil”.

Bu fikirlər I Liqada mübarizə aparan “Mingəçevir”in İdarə Heyətinin sədri Nurlan Əhmədova məxsusdur.

Klub rəsmisinin açıqlamalarından nümunə gətirməyimiz heç də səbəbsiz deyil. Son zamanlar mətbuatda ən çox müzakirə olunan klublardan biri məhz “Mingəçevir”dir. I Liqada mübarizə aparmasına baxmayaraq, komanda tez-tez gündəm olur. Xüsusən də neqativ məsələlərlə. Lakin İdarə Heyətinin sədrinin yuxarıdakı açıqlaması da sübut edir ki, yayılan məlumatların böyük əksəri həqiqəti əks etdirmir. Nurlan Əhmədovun da dediyi kimi, “Mingəçevir” rəhbərliyinin baş məşqçi Füzuli Məmmədovdan narazı qalması üçün heç bir əsas yoxdur. Olmamalıdır da. Bunun üçün komandanın nəticələrinə baxmaq kifayət edir.

Birincisi, 48 yaşlı mütəxəssis komandanı qış fasiləsində götürüb. Yanvara qədər 11 turdan sonra cəmi 6 xalı olan “Mingəçevir” Füzuli Məmmədovun rəhbərliyi altında 11 matçda 16 xal toplayıb. Bu halda hansı narazılıqdan söhbət gedə bilər?

Yaxud bu cür fikirlər səsləndirənlər qışda komandanı qəbul etməyin çətinliklərindən xəbərdardırlarmı? Mövsümün ortasında komandaya gələn məşqçi üçün istədiyi futbolçuları heyətə cəlb etmək çox çətindir. Üstəlik, Füzuli Məmmədov “Mingəçevir”ə gələrkən hazırlıq üçün vaxt çox az idi. O, komandanı cəmi 20 günə mövsümün ikinci yarısına hazırladı. Heyətə əsasən gəncləri cəlb edən Füzuli Məmmədovun qarşısına komandanı I Liqada qalmaq tapşırığı qoyulub ki, bu vəzifənin də öhdəsindən gəlmək heç də çətin görünürmür.

Düzdür, hazırda sonuncu pillə ilə aradakı xal fərqi cəmi 3-dür. Lakin “Mingəçevir”in sərgilədiyi futbol gələcəyə ümidlə baxmağa əsas verir. Növbəti tur komanda öz meydanında “Baku Sportinq”i qəbul edəcək. Cari mövsüm ilk iki dövrədə paytaxt təmsilçisini məğlub edən “Mingəçevir” bu dəfə də eyni uğuru təkrarlamaqla turnir cədvəlindəki mövqeyini daha da yaxşılaşdıra bilər.

Bölgə təmsilçisinin turnir cədvəlində “qonşuları” olan “Difai”nin 23-cü turda “Qaradağ-Lökbatan”la, “Cəbrayıl”ın isə səfərdə “Karvan”la qarşılacağını nəzərə alsaq, Füzuli Məmmədovun komandası turnir cədvəlində iki pillə irəliləyə, hətta dördüncü yerdəki “Zaqatala” ilə xal fərqini 3-ə endirə də bilər.

Bir sözlə, “Mingəçevir”in hazırkı vəziyyəti bəzilərinin təqdim etdiyi kimi, heç də kritik deyil. Mövsümün sonunda komanda nəinki I Liqada qalsa, hətta mövsümü dördüncü pillədə belə başa vursa, bu, sürpriz kimi qəbul olunmayacaq.