Elmar Baxşıyev: “Ucuz sarı vərəqə idi...”

“Ağır oyun alındı. Hər iki komanda yaxşı mübarizə apardı. Ümumi götürəndə, bilirdik ki, bizi hansı təhlükə gözləyir. Komandanı çətin oyuna hazırlaşdıranda, rəqibin üstün cəhətlərini bildirmişdik. Yolumuza davam edirik”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının 31-ci turunda “Turan Tovuz”a qarşı keçirilən oyundan sonra deyib.

Daha sonra o, jurnalistlərin suallarını cavablandırıb:

- Bir xalı qənaətbəxş sayırsınız?

- Çempionatın sonu yaxınlaşır, hər xal xalımızın üzərinə xal gətirir. "Turan Tovuz" rəqiblərimizdən biridir. Onlar da meydanda öz iddialarını göstərirdilər. Elə oyun gedirdi ki, hər iki komanda qalib gələ bilərdi.

- Kubok oyununu düşünərək bu görüşdə nəsə dəyişiklik etmişdiniz?

- Heyətimiz geniş deyil. Zədəlilərimiz də var. Bu da rotasiyaya getməyə imkan vermir.

- Hakimliklə bağlı fikriniz necədir? Əliyar Ağayev Vandersonu ilk səhvində bağışlamadı, ikinci sarı vərəqəni göstərdi, amma Faiq Hacıyevə qarşı iki dəfə yumşaq davrandı...

- Hakimlikdən danışmaq istəmirəm. Verdiyi qərara hörmətlə yanaşmalıyıq. Bu tip oyunlarda özünüz də görürsüz ki, hər iki komanda mübarizə aparır. Məncə, ikinci sarı vərəqə... ucuz sarı vərəqə idi. Hakimlər özləri də bu cür epizodlarda belə deyirlər. 

- Matçdan sonra Nuno Rodriqeslə danışığınız oldu. Nə söhbət edirdiz onunla?

- Oyuna çıxanda nə etməli olduğunu bildirmişdim. Verdiyim təlimatlarla bağlı danışdıq.

- "Qarabağ"la kubok görüşündən gözləntiniz nədir?

- Bizim üçün hər oyun önəmlidir. Bu matçı unudub, komandanı qarşıdakı görüşə hazırlayacağıq.