Yunis Hüseynov: “Bu gün 2 xal itirdik”

“Bu gün qələbə qazanmaq istəyirdik. Komandamız pis təsir bağışlamadı. Əfsuslar olsun ki, qapımızda qol gördük. Buraxdığımız qollara baxsaq, görərik ki, öz səhvlərimizdən vurulur. Qarşıdakı oyunlara hazırlaşacağıq. Çalışacağıq ki, yaxşı nəticələr əldə edək. Bu gün 2 xal itirdik”.

Futbolxeber.az saytının məlumatına görə, bu sözləri “Turan Tovuz”un məşqçisi Yunis Hüseynov Azərbaycan Premyer Liqasının 31-ci turunda “Araz-Naxçıvan”la bərabərə (1:1) qaldıqları oyun barədə danışarkən deyib.

Sonra o, jurnalistlərin suallarını cavablandırıb:

- Oyunun əhəmiyyətinin və rəqibin azlıqda qalmasını nəzərə alaraq sonda risk edəcəyiniz gözlənilsə də, bu, baş vermədi. Niyə?

- Risk etmək istəmədik. Bu gün qalib gəlsəydik, rəqibə yaxınlaşırdıq. "Vabank" da getmək istəmədik. Qarşıda 5 tur var və hər şey dəyişə bilər. Bu gün əlimizdə olanlardan istifadə etdik. Zədəlilərimiz çoxdur. Ona görə də, risk etmədik.

- Jo Batiştanın oynamamasına səbəb nə idi? Zədələli idi?

- Bəli. Zədəlilərimiz çoxdur. Dünənki məşqdə də Jo ciddi zədə aldı. Əməliyyat ediləcək. Mövsümü demək olar ki, bitirib. Zədəlilər qayıtsalar, oyunumuz tamam başqa cür olacaq.