Rafael Utziq: “Zərbəmdən sonra topun qapı xəttini keçdiyini görmüşdüm”

“Zirə”nin hücumçusu Rafael Utziqin Futbolxeber.az saytına müsahibəsi

- Azərbaycan Premyer Liqasının 28-ci turunda “Şamaxı”nı 3 cavabsız qolla üstələdiniz. Qələbəni necə şərh edərdiniz?

- “Şamaxı”ya qarşı bütün oyunlarımız çətin keçir. Budəfəki matç da istisna olmadı. Nəyin bahasına olursa-olsun, qələbə bizim üçün vacib idi. Bunu bacardığımıza görə sevinirəm. Çox vacib 3 xal qazandıq.

- Fasilədən sonra oyununuzun daha yaxşı alınması nə ilə bağlı idi?

- Əvvəlki turda “Sabah”la matçda da ilk hissədə bir qədər zəif təsir bağışlamışdıq. Bu dəfə də eyni hala şahidlik etdik. Yenə də ilk hissədə müəyyən çətinliklərimiz oldu. Fasilədən sonra baş məşqçimizin tapşırıqlarını daha yaxşı yerinə yetirməyə başladıq və ardıcıl qollar vurduq.

- Avrokuboklar uğrunda mübarizədə əsas rəqibləriniz olan “Araz-Naxçıvan”, “Turan Tovuz” və “Sabah” bu tur xal itirmişdi. Bu məqam “Şamaxı” ilə görüşdə motivasiyanızı daha da artırdı?

- 2-5-ci yerlərdə qərarlaşan komandalar arasında gərgin mübarizə gedir. Buna görə də hər xal qiymətlidir. Lakin biz digər oyunlara fikir vermirik. Yalnız öz matçlarımıza köklənirik. Məqsədimiz hər görüşdə qələbə qazanmaqdır.

- Vurduğunuz qolu necə təsvir edərdiniz? Həmin epizodda qarışıqlıq yarandı və bilinmədi ki, topu siz qapıdan keçirdiniz, yoxsa Davit Volkov...

- Mənim zərbəmdən sonra topun qapı xəttini keçdiyini görmüşdüm. Buna baxmayaraq, oyun davam etdi və Volkov fərqləndi. Ümumi götürdükdə, kimin qol vurmasının fərqi yoxdur. Əsas kollektivin qələbəsidir.

- Qarşıdakı iki turda “Qarabağ” və “Neftçi” ilə səfərdə qarşılaşacaqsınız. Həmin matçlardan gözləntiləriniz nədir?

- Təbii ki, hər iki qarşılaşma çox çətin keçəcək. İstər “Qarabağ”la, istərsə də “Neftçi” ilə səfərdfə oynamaq çox ağırdır. Bununla belə, düşünürəm ki, bu oyunlardan üzüağ çıxmağa qadirik. Baş məşqçimiz də bizə lazımi tapşırıqlarını verəcək.

İbrahim Cəfərov