Rəşad Sadıqov: “Bu gün 3 xal qazanmağımız olduqca önəmli idi”

“Milli fasilədən sonra ilk oyunumuz idi. Birinci hissənin ilk 5-10 dəqiqəsi bizim üçün yaxşı başladı. Amma sonra oyun bizim üçün çətinləşdi. İstədiyimiz hücumları qura bilmirdik. Fasilədən sonra komandam xeyli fəallaşdı və düşünürəm ki, vacib 3 xal qazandıq. Bilirdik ki, rəqib əzmkardır. Xüsusilə, son turlarda iddialı komandalara qarşı yaxşı oyunu ilə seçilir. Biz oyuna yaxşı köklənmişdik”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının 28-ci turunda "Şamaxı”ya 3:0 hesabı ilə qalib gəldikləri oyundan sonra deyib.

Daha sonra o, jurnalistlərin suallarını cavablandırıb:

- Fasilədə komandaya hansı tapşırıqları verdiniz ki, 2-ci hissəni belə yaxşı keçirdiniz?

- Fasilədə daha çox hücumda daha fəal olmağı tapşırıqlarını verdik. Çünki 0:0 hesabı bizi qane etmir və "Şamaxı"nın əks-hücumları, cinahdan asmalarından hər an fərqlənə bilərdilər. Hesabı açdıq və 2-ci qoldan sonra oyun bizim üçün daha rahat keçdi.

- Növbəti 2 turda "Qarabağ" və "Neftçi" ilə səfərdə qarşılaşacaqsınız. Komanda bu gərgin qrafikə hazırdır?

- Həmin oyunları nəzərə alsaq, bu matçda 3 xal qazanmağımız olduqca önəmli idi. Qarşıdakı matçlara da xallar qazanmaq üçün çıxacağıq.