“Şamaxı”nın məşqçisi: “Məğlubiyyətimizin U-21-lə heç bir əlaqəsi yoxdur”

“Bilirdik ki, çempionatın ən sərt komandasına qarşı oynayırıq. Çalışdıq nəsə edək, alınmadı”.

Futbolxeber.az saytının məlumatına görə, bu sözləri “Şamaxı”nın məşqçisi Elnur Çodarov Azərbaycan Premyer Liqasının 28-ci turunda “Zirə”yə 0:3 hesabı ilə uduzduqları oyundan sonra deyib.

O, heyətdə itkilər olduğunu bildirib: “Hücumçumuz Maykl Tike son məqamda özünü nasaz hiss elədi. Ona görə də, bu oyuna itkilərlə çıxdıq. Birinci hissədə Vladislavın Veremeyevin zədələnməsi, Mikelsin oyuna tam hazır olmaması planlarımızı pozdu. İkinci hissəyə yaxşı başlamadıq. Sadə səhvlərdən qollar buraxdıq. Dəyişiklik etmək istədik. Amma alınmadı. "Zirə"ni təbrik edirəm”.

“Ayxan Abbasovun fasilə müddətində U-21-lə birgə Türkiyədə olmasının məğlubiyyətə hər hansı bir təsiri oldumu?” sualını E.Çodarov belə cavablandırıb: “Ayxan müəllim komandanın yanında olmasa da, futbolçuları daim nəzarətdə saxlayırdı. Onun proqramı əsasında komanda hazırlıq keçirdi. Üstəlik, bütün məşqlərin videoyazısını da izləyirdik. Odur ki, məğlubiyyətimizin U-21-lə heç bir əlaqəsi yoxdur”.