Millimiz Maltaya uduzub qrup sonuncusu oldu

Azərbaycanın qadınlardan ibarət U-17 millisi bu gün Avropa çempionatının 2-ci seçmə mərhələsində 3-cü oyununu keçirib.

Futbolxeber.az saytının məlumatına görə, B Liqasının 2-ci qrupunda yer alan millimiz son matçında Malta yığması ilə üz-üzə gəlib.

Bayıl stadionunda təşkil olunan qarşılaşma Maltanın 2:0 hesablı qələbəsi ilə başa çatıb.

Qrupun digər oyununda eyni vaxtda Lüksemburq və Bolqarıstan kollektivləri üz-üzə gəlib. Bolqarıstan 4 cavabsız qolla rəqibini üstələyib.

Bu nəticələrdən sonra Bolqarıstan və Lüksemburq 6 xalla qrupda 1-ci və 2-ci yerləri bölüşüblər. Malta və Azərbaycan millisi isə hərəyə 3 xalla müvafiq olaraq 3-4-cü yerlərdə qərarlaşıblar. Qrup lideri olan Bolqarıstan A Liqasına yüksəlib.

Qeyd edək ki, Azərbaycan millisi bundan əvvəl Lüksemburqa 0:5 hesabı ilə uduzub, Bolqarıstana 3:2 hesabı ilə qalib gəlib.