Vəli Qasımov: “Qarabağ”a gücünə görə azarkeşlik edirlər, amma ürəklərdə “Neftçi”dir”

“Neftçi” klubunun sabiq futbolçusu və baş məşqçisi Vəli Qasımov İdman.biz-ə müsahibə verib. Futbolxeber.az saytı həmin müsahibəni təqdim edir:

- Bu gün “Flaqman”ın yarandığı gündür. 88 yaşını tamamlayan “Neftçi” sizin üçün nə deməkdir?

- “Neftçi” bizim ürəyimizdir. O vaxt futbolçuların çoxu bu komandada oynamaq istəyirdi. Mənim bəxtim gətirdi ki, bu xoşbəxtlik mənə nəsib oldu. Ən gözəl vaxtlarım “Neftçi”də keçib. Təəssüf ki, biz komanda olaraq böyük nəticələrə imza ata bilmədik. Keçmiş SSRİ dövründə rəqabət çox güclü idi, “Spartak”, “Dinamo” kimi əjdaha komandalar vardı. Buna baxmayaraq, 1986-cı ildə birinci dövrədən sonra komanda üçüncü yerdə gedirdi, yekunda doqquzuncu olduq.

- Həmin dövrdə məşhurluğu necə yaşayırdınız?

- Bizi çox adam tanıyırdı. Küçədə yaxınlaşıb şəkil çəkdirirdilər, avtoqrof istəyirdilər. Camaat rayonlardan “Neftçi”nin oyununu dəstəkləməyə gəlirdi. Stadionda yer də tapa bilmirdilər, pilləkənlərə qədər dolu olurdu. O vaxt futbolçuların səviyyəsi yüksək olduğu üçün insanlar futbola böyük maraq göstərirdi. Bu gün çox şey dəyişib, futbolumuzda xaricilərin sayı artıb. Çox güman bu amillərin də təsiri var. Yadımdadır, komandaya təzə gəldiyim vaxtlarda təkcə məşqlərə baxmağa dörd-beş min adam gəlirdi. Bu gün heç o qədər adam oyunlara gəlmir. “Neftçi” uduzanda küçəyə çıxmağa utanırdım. O vaxt futbola münasibət də tamam başqa cür idi.

- “Neftçi”də keçirdiyiniz ən yaddaqalan oyun hansı olub?

- Bakıda SSRİ yığma komandası ilə keçirdiyimiz görüşü qeyd edə bilərəm. O vaxt İttifaqın ən güclü futbolçuları gəlmişdi. Oyun 1:1 bitdi. Heç kim bu komanda ilə heç-heçə edəcəyimizi gözləmirdi. Həmin oyundan sonra bizi xeyli təriflədilər (gülür).

- Komanda yoldaşlarınız arasında ən yaxın dostunuz kim olub?

- Bu günə kimi bir çoxu ilə dostluq münasibəti davam edir. Həm komanda yoldaşlarımla, həm də məşqçilərlə aram həmişə çox yaxşı olub. Xüsusi olaraq kiminsə adını çəkmək düzgün olmaz. Mən ümumiyyətlə, problemli adam deyiləm.

- “Neftçi”nin Azərbaycan futbolundakı yerini necə təsvir edərdiniz?

- “Neftçi” bu günə kimi Azərbaycanın “Flaqman”ıdır. O vaxt Azərbaycanın ən güclü komandası olmuşuq. Çox istərdik ki, həmin “Neftçi”ni indi də görək.

- Sizcə, niyə görə bilmirik?

- Səbəblər çoxdur. Ancaq bu haqda danışmaq bir qədər çətindir, çünki hazırda orada işləmirəm. Çox güman, klubun daxilində müəyyən problemlər var. “Neftçi” hələ tam düzəlməyib, ancaq inanıram ki, komanda öz adını yenidən qaldıracaq. Bu gün “Qarabağ” gözəl oyun nümayiş etdirdiyi və güclü olduğu üçün hamı onlara azarkeşlik edir. Amma həmişə ürəyimizdə “Neftçi” olub. “Neftçi” “Neftçi”dir də.