“Zirə”nin kapitanı: “Santuşdan dəvət gözləyirdim”

“Zirə”nin kapitanı Qismət Alıyevin Futbolxeber.az saytına müsahibəsi

- Azərbaycan Premyer Liqasının 27-ci turunda “Sabah”la xalları yarı böldünüz. 1:1-lik heç-heçəni necə şərh edərdiniz?

- Bilirdik ki, çətin oyun olacaq. Bəlkə də “Sabah” üçün çempionatda avrokuboklara yollanmaq baxımından son şans idi. İlk hissə çox ağır alındı. Heç cür öz oyunumuzu tapa bilmədik. Fasilədən sonra toparlandıq və lazımi qolu vurduq. Düşünürəm ki, heç-heçə hər iki komanda üçün sərfəli nəticədir.

- İlk hissədə oyununuzu tapa bilməməyiniz nədən irəli gəlirdi?

- Rəqibin təzyiqi çox idi. İstər oyun epizodlarında, istərsə də standart vəziyyətlərdə çox təhlükəli idilər. Fasilədən sonra komanda özünə gəldi. Ümid edirəm ki, bu, sonuncu olar. Bir daha belə oynamamalıyıq. - Matçın sonuna yaxın hiss olunurdu ki, “Zirə” heç-heçəyə razıdır. 1 xal sizi qane edirdi?

- Oyunun gedişi elə heç-heçəyə layiq idi. Dediyim kimi, birinci hissədə onlar üstün oynadılar, fasilədən sonra isə biz.

- Bu, ikinci yer uğrunda əsas rəqibiniz olan “Araz-Naxçıvan”ın bir gün əvvəl xal itirməsindən irəli gəlirdi? Yəni düşünürdünüz ki, olmayan yerdə 1 xal da qənimətdir...

- Fikrimiz qələbə qazanmaq idi. Amma alınmadı. Səhvlərimizi analiz edib növbəti matçlara daha ciddi hazırlaşmalıyıq.

- Gedişat onu göstərir ki, “Zirə” əmin addımlarla ikinci pilləyə doğru gedir...

- Hələ qarşıda 1 dövrə var. Çempionat hazırda elə vəziyyətdədir ki, autsayder hesab edilən “Kəpəz” də “Qarabağ”dan xal alır. Heç bir rəqib oyunda asanlıqla qələbə qazanmaq mümkün deyil.

- Kubokda mübarizəni dayandırmısınız. Bu məqam avrokuboklar baxımından “Zirə”nin əleyhinədir, yoxsa apreldəki sıx qrafiki nəzərə alsaq, lehinə?

- Keçən il də bu cür sıx qrafikdə oynamışdıq. Lakin finala yüksəlmişdik. Finalda oynamaq hər bir komanda üçün qürurvericidir. Biz də yenidən final həyəcanı yaşamaq istəyirdik. Təəssüf ki, alınmadı. İndi əsas hədəfimiz ikinci yeri tutmaqdır.

- Bu günlərdə milli komandamızın heyəti açıqlandı. Şəxsən mənim üçün, eləcə də bir çoxları üçün sizin adınızın siyahıda yer almaması gözlənilməz oldu. Bəs sizin üçün?

- Milli komandanın baş məşqçisinin seçimidir. Mənim işim meydandadır. Baş məşqçi çağırmayıbsa, yerimdə dayana bilmərəm. Yenə də əlimdən gələnin ən yaxşısını etməyə çalışacağam.

- Yaxşı, onda sualı belə qoyum. Nəzərə alsaq ki, “Zirə” son dövrlər əla formadadır, siz də komandanın kapitanısınız, bu halda milli komandanın baş məşqçisi Fernandu Santuşdan dəvət gözləyirdiniz?

- Gözləməyinə, bəli, gözləyirdim. Çağırmayandan sonra fikir bildirmək düz olmaz. Bəlkə də daha əvvəl çağırılmayan futbolçuları yoxlamaq istəyirəm. İstənilən halda qərara hörmətlə yanaşıram.

İbrahim Cəfərov