Cavid Hüseynovun bəhanələri

Dünəndən prosesləri izləyirəm, bacardığım qədər rəyləri oxuyuram. Əksəriyyət yazır/iddia edir ki, Cavid Hüseynov oyundan sonrakı açıqlamalarına görə klubdan göndərilib. Dəqiq elədir? Bəlkə Cavid Hüseynova əvvəldən deyilib ki, bu, son şansındır. "Neftçi"yə də uduzsan, göndəriləcəksən. O da bilib ki, gedəcək, buna görə də elə danışıb. Ola bilər?

İkincisi, Cavid Hüseynov hansı sponsorsuzluqdan danışır? Komanda vaxtında maaşını alır? Alır. Qidalanma, vitaminizasiya, səfər oyunları üçün nəqliyyat, otel - hamısı qaydasındadır? Qaydasındadır. Daha başqa nə olmalıdır ki? Məşq etməyə yer, ev oyunlarını keçirmək üçün stadion var? Var! "Kəpəz" kimi həftənin 2 günü Gəncədə, 1 günü Bakıda, 1 günü Tovuzda, 2 günü Goranboyda məşq eləmirsiniz ki. Doğma stadionunuzdan aralı düşməmisiniz ki.

Cavid Hüseynov "Şamaxı"ya uduzanda niyə bu bəhanələri gətirmirdi?

O ki qaldı transferlərə, Mirabdullanı, Nşutini, Muradovu, Nikoliçi komandaya kim götürüb? Təbii ki, Cavid Hüseynov. Başqa nə olmalıdır? Messini transfer etməli idilər?

Yox, sponsor/rəhbərlik nəsə söz verib etməyibsə, bu, daha əvvəl olub. Hər halda inanmıram ki, kimsə deyə ki, martda 5 futbolçu transfer edəcəm. Bax, onda çıxıb danışmaq lazım idi, Cavid bəy. Elə bir şey var idisə, çıxardınız deyərdinz ki, rəhbərlik mənə 10 transfer söz verdi, eləmədi və mən gedirəm.

Yoxsa ki, sona 9 tur qalıb, “Səbail” “Kəpəz”dən 5 xal geridir, gələn tur da səfərdə əsas rəqibinizlə oynayırsınız, başa düşürsünüz ki, uduzsanız, xal fərqi qalxacaq 8-ə və son 8 turda bunu aradan qaldırmağınız qeyri-mümkündür. İndi durub deyirsiniz ki, sponsor belə gəldi, rəhbərlik elə getdi. İndiki məqamda bu fikirlər sadəcə və sadəcə bəhanə, uğursuzluğu ört-basdır etməkdir.

2 il əvvəl “Şamaxı” niyə düşmüşdü Premyer Liqadan? Onda da “Şamaxı”nın sponsorları komandaya pul ayırmırdılar? Bəlkə ancaq yerli futbolçularla oynadığı üçün I Liqaya düşmüşdü “Şamaxı”? Cavid Hüseynovun da əvvəldən xəbəri olmayıb axı “Şamaxı” ancaq yerlilərlə oynayacaq. Eynən “Səbail”ə gələndə hara gəldiyini bilmədiyi kimi...

TAĞI