Azər Salahlı: “Kubokdan Avroliqaya getməyimiz bir qədər asan görünür”

“Neftçi”nin müdafiəçisi Azər Salahlının Futbolxeber.az saytına müsahibəsi

- “Səbail”lə gərgin keçən oyunda 3 xal qazandınız. 2:1 hesablı qələbəni necə şərh edərdiniz?

- Süni meydanda oynamaq bir az ağır olur. Üstəlik, oyun bir qədər erkən saatda idi. Hava da isti idi. Bütün bunlara baxmayaraq, qələbə qazandığımız üçün sevincliyik.

- Bəzi futbolçuların oruc tutması çıxışınıza təsir göstərdi?

- İsti hava şəraitinə uyğunlaşmaq bir qədər çətin idi. Eləcə də bəzi futbolçularımız oruc tutmuşdular. Buna baxmayaraq, verilən tapşırığın öhdəsindən gələ bildik.

- Yarım saatın tamamında 2:0 hesabı ilə öndə idiniz. Sonradan nə baş verdi ki, üstünlük “Səbail”in tərəfinə keçdi?

- Oyuna çox yaxşı başladıq. Ardıcıl qollar vurduq. Sonra yenə də fərqlənə bilərdik. Bunun üçün imkanlarımız da var idi. Təəssüf ki, onları dəyərləndirə bilmədik. Rüfət Abdullazadə birinci hissənin sonuna yaxın gözəl vurdu. Ondan sonra təşəbbüs rəqibə keçdi. Bununla belə, çətin də olsa, qələbə hesabını sona kimi qoruya bildik.

- Ölkə çempionatında 12 günlük fasilə yaranır. Nəzərə alsaq ki, hazırda “Neftçi” pis formada deyil, bu məqam komandanıza mənfi təsir göstərməyəcək?

- Çalışacağıq ki, tempi qoruyaq, daha da yaxşı hazırlaşaq. Fasilədən sonra kubok matçları da olacaq. Ümumiyyətlə, sıx qrafikdə oynayacağıq. Buna hazır olmağa çalışacağıq.

- Fasilədən sonrakı ilk matçınız “Araz-Naxçıvan”a qarşıdır. Hansı ki, bu komandaya qarşı oyunlarınız yaxşı alınmır...

- “Araz-Naxçıvan” hazırda üçüncü pillədə gedir. Odur ki, bizi gərgin oyun gözləyir. Ümumiyyətlə, çempionatda asan rəqib yoxdur. Hər komandaya qarşı oynamaq çətindir. Buna baxmayaraq, əlimizdən gələni edəcəyik ki, qələbə qazanaq.

- Ölkə kubokunda yarımfinalda “Sabah”la qarşılaşacaqsınız. Gözləntiləriniz nədir?

- Çətin olacaq təbii ki. Hədəfimiz hər oyunda qələbə qazanmaqdır. Çempionatda da, kubokda da. Bütün gücümüzü qoyacağıq ki, finala yüksələk.

- Demək olar ki, “Neftçi” üçün kubok avrokuboklara yollanmaq baxımından son şansdır?

- Düz qeyd etdiniz, kubokdan Avroliqaya getməyimiz bir qədər asan görsənir. Bunun üçün çalışacağıq.

Fərəc Aslanov