Azər Bağırov: “Qurban müəllimin sözünün qarşısında söz deyə bilmərəm”

“Bütün azarkeşlərimizə təşəkkür edirəm. 1 xal da bizim üçün qənimətdir. "Qarabağ"a qarşı oynamaq həmişə çətindir. Normal oyun getdi. Uduza da bilərdik. "Qarabağ"a qarşı əks-hücumda oynamağa məcbursan”.

Futbolxeber.az saytının məlumatına görə, bu sözləri "Kəpəz”in baş məşqçisi Azər Bağırov Azərbaycan Premyer Liqasının 27-ci turunda “Qarabağ”a qarşı keçirilən oyundan (0:0) sonra deyib.

Daha sonra o, jurnalistlərin suallarını cavablandırıb:

- Qurban Qurbanov dedi ki, meydança sulanmayıb. Bu fikirlə razısınız?

- Qurban müəllimin sözünün qarşısında söz deyə bilmərəm. Dediyində həqiqət var.

- Ev matçlarınızın erkən saatlarda olması işığa qənaət etmək üçündür?

- "Kəpəz"də heç nəyə qənaət olunmur. Məşqçinin bütün istəkləri yerinə yetirilir. PFL oyunu hansı saata salsa, oynamağa hazırıq.

- Komandanın içində olan problemləri tapa bildiniz?

- Komandamız üçüncü dövrədə ən yaxşılardan idi. İçəridə olan problemləri özümüz müzakirə edirik. Həmin problemlər tapılıb. Bugünkü oyun da bunun nəticəsidir.