“Turan Tovuz”un müdafiəçisi: “Komanda şəklində xarakter göstərdik”

“Oyuna istədiyimiz kimi başlaya bilmədik. Sonra da qırmızı vərəqə aldıq. Azlıqda qalmağımıza baxmayaraq, komanda şəklində xarakter göstərdik. Buna görə uşaqlara təşəkkür edirəm. Növbəti matçlarda da bu cür xarakter göstərib, qələbə qazanmağa çalışacağıq”.

Futbolxeber.az saytına müsahibəsində bu sözləri “Turan Tovuz”un müdafiəçisi Faiq Hacıyev Azərbaycan Premyer Liqasının 26-cı turunda “Neftçi”yə qarşı keçirilən oyundan (1:1) sonra deyib.

O, 88-ci dəqiqədə qapılarında qol görmələrinə baxmayaraq, inamlarını itirmədiklərini bildirib: “Oyun 90 dəqiqədir, artırmalarla daha çox olur. Azlıqda qalsaq da, inamımızı itirməmişdik. Bu futboldur, nəinki 10, lap 9 nəfərlə də qala bilərsən. Sona qədər vuruşmaq lazımdır”.

26 yaşlı futbolçu qazanılan 1 xalı uğurlu nəticə hesab edir: “Neftçi” kimi komandaya qarşı 10 nəfərlə heç-heçə etmək yaxşı nəticədir. Topa nəzarət rəqibdə idi. Biz öz vaxtımızı gözlədik. Rəqiblə müqayisədə bizim üçün 1:1 yaxşı nəticədir”.

Bu heç-heçə sayəsində üçüncü pillədəki “Araz-Naxçıvan”la “Turan Tovuz” arasındakı xal fərqi birə enib. Lakin F.Hacıyev qeyd edib ki, bu məqama çox da diqqət yetirmirlər: “Bizim hədəfimiz öz oyunlarımızda qalib gəlməkdir. Turnir cədvəlinə baxmırıq. Öz matçlarımızı qələbə ilə başa vursaq, daha yüksək yerlərdə olacağıq”.

“Turan Tovuz” avrokuboklarda çıxış etməyə hazırdırmı?” sualını F.Hacıyev belə cavablandırıb: “Bunu zaman göstərəcək. Bunun üçün çalışırıq. Lakin indidən dəqiq nəsə demək çətindir”.

İbrahim Cəfərov